بيىلعى جىلدىڭ 10 ايىندا وڭتۇستىك استانادا مىندەتتى الەۋمەتتىك مەديسينالىق ساقتاندىرۋ ەسەبىنەن 700 مىڭعا جۋىق مەديسينالىق وڭالتۋ قىزمەتى كورسەتىلدى. وعان مەديسينالىق ساقتاندىرۋ قورى تاراپىنان 5،8 ملرد تەڭگە تولەندى. بۇل تۋرالى بۇگىنگى بريفينگتە مسق الماتى فيليالىنىڭ ديرەكتورى تىلەۋحان ابىلدايەۆ ايتتى، دەپ حابارلايدى اlmaty-akshamy.kz.
ايتۋىنشا، مەديسينالىق ساقتاندىرۋ وڭالتۋ مەن پاسيەنتتەردىڭ دەنساۋلىعىن قالپىنا كەلتىرۋگە باعىتتالعان ەم-شارالاردىڭ قولجەتىمدىلىگىن ارتتىرۋعا مۇمكىندىك بەرىپ وتىر.
«ءمامس ەنگىزىلگەلى بەرى مەديسينالىق رەابيليتاسياعا بولىنەتىن قارجى كولەمى 13 ەسە ارتتى. سالىستىرار بولساق، 2019 جىلى وڭالتۋ قىزمەتىنە بار-جوعى 600 ملن تەڭگە جۇمسالعان بولسا، 2022 جىلى رەابيليتاسيالىق قىزمەتتەرگە 7،5 ملرد تەڭگە قاراستىرىلعان»، - دەدى تىلەۋحان ابىلدايەۆ.
قازىرگى تاڭدا دەنساۋلىعىندا ءتۋابىتتى اقاۋى بار، ينسۋلت نەمەسە ينفاركت سالدارىنان ميداعى قان اينالىمى بۇزىلعان، ومىرتقاسىنا، بۋىندارىنا نەمەسە كارديوحيرۋرگيالىق وتا جاساتقان، قيمىل-قوزعالىس اپپاراتى زاقىمدانعان پاسيەنتتەر مەديسينالىق وڭالتۋدان وتە الادى. ءمامس ارقىلى كورسەتىلەتىن ەمنىڭ بۇل ءتۇرى ەمحانالار مەن اۋرۋحانالاردا عانا ەمەس، جەكە مەنشىك كلينيكالاردا، رەابيليتاسيالىق جانە سپورتتىق-وڭالتۋ كەشەندەرى مەن ساناتورييلەردە دە كورسەتىلەدى.
«قور بارلىق پروفيلدەر، سونىڭ ىشىندە وڭالتۋ قىزمەتى بويىنشا جاڭا كلينيكالاردى جۇمىسقا تارتۋمەن تۇراقتى تۇردە اينالىسادى. بۇل ەمدەۋ مەكەمەلەرىندەگى كەزەكتى ازايتىپ، پاسيەنتتەردىڭ مەديسينالىق كومەكتى پايدالانۋ قۇقىعىن قامتاماسىز ەتۋگە كومەكتەسەدى. بيىل الماتى قالاسىندا 75 مەديسينا ۇيىمى رەابيليتاسيا ءپروفيلى بويىنشا قىزمەت كورسەتىپ جاتىر. ولاردىڭ ءبارى قورمەن كەلەسىمشارت بەكىتكەن»، - دەدى تىلەۋحان ابىلدايەۆ.
ءبىر ايتا كەتەرلىگى، پاسيەنت رەابيليتاسيادان وتەتىن كلينيكانى ءوز بەتىنشە تاڭداي الادى. ولاردىڭ ناقتى تىزىمىمەن قوردىڭ fms.kz سايتى ارقىلى تانىسۋعا بولادى. جولداما اۋرۋحانانىڭ نەمەسە ەمحانانىڭ مۋلتيديسيپلينارلىق كومانداسىنىڭ قورىتىندىسى نەگىزىندە بەرىلەدى.