ولار قالىپتى ومىرگە ورالدى.
2022 جىلى «ارۋانا» مەديسينالىق وڭالتۋ ورتالىعىندا 1700-گە جۋىق پاسيەنت وڭالتۋدان ءوتتى. ونىڭ ءبىر مىڭنان استامى – ينسۋلت العاندار، دەپ حابارلايدى Almaty-akshamy.kz.
ورتالىق ماماندارى ينسۋلت، اۋىر وپەراسيالار مەن جاراقاتتار العان ازاماتتاردىڭ دەنساۋلىعىن شەتەلدىك ادىستەمەلەر كومەگىمەن قالپىنا كەلتىرىپ، اياققا تۇرۋىنا كومەكتەسەدى.
ورتالىق ديرەكتورى شىنار مالىكتىڭ سوزىنە سۇيەنسەك، «ارۋانا» الەۋمەتتىك باعىت ۇستانادى جانە مۇندا پاسيەنتتەرگە رەابيليتاسيالىق كومەك اقىلى تۇردە كورسەتىلمەيدى.
«ءبىز مەديسينالىق ساقتاندىرۋ قورىمەن 2021 جىلدان بەرى جۇمىس ىستەپ كەلەمىز. سوڭعى 2 جىلدا كلينيكادا 2600-دەن استام ادام ءمامس ەسەبىنەن رەابيليتاسيالىق كومەك الىپ، قالىپتى ومىرگە ورالدى»، - دەيدى شىنار مالىك.
كلينيكا رەابيليتاسيانىڭ ءۇشىنشى جانە ەكىنشى دەڭگەيى بويىنشا قىزمەت كورسەتەدى. سونىڭ ىشىندە نيەۆرولوگيا، نەيروحيرۋرگيا، كارديولوگيا، كارديوحيرۋرگيا، تراۆماتولوگيا، ورتوپەديا سىندى 6 باعىت بار. ورتالىقتىڭ كلينيسيست ماماندارى پاسيەنتتەردى ەۋروپا مەن قىتايدىڭ تيىمدىلىگى دالەلدەنگەن ادىستەمەلەرى نەگىزىندە ەمدەيدى.
شىنار مالىكتىڭ ايتۋىنشا، ورتالىق ينسۋلت العان پاسيەنتتەردى ەرتە وڭالتۋعا باسا ءمان بەرەدى.
«ينسۋلت العاننان كەيىنگى باستاپقى ءۇش ايدىڭ بەرەر مۇمكىندىگى مول. ەگەر ەم دۇرىس بولسا وسى ۋاقىت ىشىندە پاسيەنتتىڭ ءومىرىن ساقتاپ قانا قويماي، اعزانىڭ قىزمەتى بۇزىلعان ءبىرشاما فۋنكسياسىن قالپىنا كەلتىرۋگە بولادى. بىزدە مۇنداي پاسيەنتتەرگە بىلىكتى پسيحولوگتار، لوگوپەدتەر، فيزيوتەراپيەۆتەر، ەمدىك-شىنىعۋ نۇسقاۋشىلارى جانە تاعى دا باسقا ماماندار قىزمەت كورسەتەدى»، - دەيدى ول.
پاسيەنتتەر ورتالىقتا ورتا ەسەپپەن 10 كۇن ەمدەلەدى جانە كۇن سايىن دەنساۋلىقتى قالپىنا كەلتىرەتىن ەم-شارالاردى ۇزدىكسىز الىپ وتىرادى. اتاپ ايتقاندا، ماسساج، فيزيوتەراپيا، كينەزيوتەراپيا سەانستارىنان ءوتىپ، لوگوپەد، ەمدىك شىنىقتىرۋ ماماندارىمەن جۇمىس ىستەيدى. جاتتىعۋ زالى ءتۇرلى زاماناۋي قوندىرعىلارمەن جابدىقتالعان.
سونىمەن قاتار، مۇندا پاسيەنتتەردىڭ تۋىستارى سىرقاتقا شالدىققان ادامدى دۇرىس كۇتىپ-باپتاۋ سىرلارىن دا ۇيرەنە الادى.