الماتىلىق كەسكىندەمە شەبەرلەرىنىڭ كورمەسى پاۆلوداردا اشىلدى

وسى جولى ەكپوزيسياعا وڭتۇستىك استانانىڭ كورىكتى جەرلەرى مەن قازاق حالقىنىڭ تۇرمىس-تىرشىلىگىن پاش ەتەتىن 70-تەن استام تۋىندى ۇسىنىلدى.

كارتينالاردىڭ اۆتورلارى الماتى ونەر اكادەمياسىنىڭ تۇلەكتەرى. كورمە ۇيىمداستىرۋشىلارىنىڭ ايتۋىنشا، وسى تەكتەس شارالار ونەرسۇيەر قاۋىم اراسىندا جوعارى سۇرانىسقا يە. كورمە اشىلعالى جۇزدەگەن ادام كەلىپ، قىلقالام شەبەرلەرىنىڭ شىعارماشىلىعىمەن تانىسىپ ۇلگەردى، دەپ حابارلايدى Almaty-akshamy.kz 24.kz-كە سىلتەمە جاساپ.

كورەرمەن نازارىنا ۇسىنىلعان كارتينالاردىڭ قاتارىندا كوركەمسۋرەت مۋزەيىنىڭ قورىندا ساقتالعان اتاقتى سۋرەتشى ءابىلحان قاستەيەۆتىڭ «مەنىڭ وتانىم» تۋىندىسى بار. كورمەدە، سونىمەن قاتار، پورترەت، ناتيۋرمورت، پەيزاج جانرىندا ورىندالعان شىعارمالاردى دا تاماشالاۋعا بولادى.

«ماقتانىشىمىز – ءابىلحان قاستەيەۆتىڭ كارتيناسى. وسىنداي ۇلكەن فورماتتى كارتينا ءبىزدىڭ وبلىستىق مۋزەيىندە عانا بار قازاقستان بويىنشا. بۇل كارتينادا ءابىلحان قاستەيەۆ ءوزىنىڭ تۋعان جەرىنىڭ اسەمدىگىن، تابيعاتىن، سۇلۋلىعىن، بايلىعىن، كورستەكىسى كەلگەن. بۇل كارتينادا سول كەزدەگى زامانعا ساي دامىپ كەلە جاتقانى بەينەلەنگەن. ارتقى فوندا قازاقتىڭ ۇلتتىق ءومىر سالتى بەينەلەنگەن»، - دەيدى  وبلىستىق كوركەمسۋرەت مۋزەيىنىڭ قىزمەتكەرى كاميللا بايبولوۆا.