الماتىلىق كەلىنشەك ءوزىنىڭ ءتىرى ەكەنىن دالەلدەي الماي ءجۇر

ءقازىر اتالعان ىسكە قاتىستى تەرگەۋ جۇرگىزىلىپ جاتىر

الماتىلىق كەلىنشەك ءوزىنىڭ ءتىرى ەكەنىن دالەلدەي الماي ءجۇر، دەپ حابارلايدى Almaty-akshamy.kz Almaty.tv-گە سىلتەمە جاساپ.

ويتكەنى، قايتىس بولعان تانىسى ءبىر كەزدەرى تۇسىنىكسىز سەبەپتەرمەن بىرنەشە مارتە قىزدىڭ ءاتى-جونىن قولدانعان كورىنەدى. 

«اۋەلگى اڭگىمە كومەكشى بوپ كەلگەن مارقۇمنىڭ قارىزعا اقشا الۋىنان باستالدى»،– دەيدى قالا تۇرعىنى.
كەيىننەن ول فيدان ابيلوۆانىڭ مالىمەتتەرىن ءوز قۇجاتى رەتىندە پايدالانىپ، اۋرۋحاناعا جاتقان.
«مۇنىڭ ءبارىن بىلتىر  26 قىركۇيەكتە ءبىلدىم. مەنىڭ جەكە كۋالىگىمدى كوشىرمەدەن وتكىزىپ، بىلگەنىن ىستەپتى. ول قايتىس بولىپ كەتتى عوي، ال مەن ءالى دە ءوزىمنىڭ ءتىرى ەكەنىمدى دالەلدەي الماي قۇجات جيناپ ءجۇرمىن»، – دەدى قالا تۇرعىنى فيدان ابيلوۆا.

فيدان ابيلوۆا جينالعان قۇجاتتىڭ ءبارىن پروكۋراتۋراعا وتكىزگەنىن ايتادى. كەيىننەن ءمالىم بولعانداي، قايتىس بولعان ادام ابيلوۆانىڭ ءاتى-جونىن 6 ايداي قولدانعان. ءقازىر اتالعان ىسكە قاتىستى تەرگەۋ جۇرگىزىلىپ جاتىر.

«ازاماتشانىڭ پروكۋراتۋراعا بەرگەن ارىزىنىڭ نەگىزىندە اكتىلىك جازبانىڭ كۇشىن جويۋ تۋرالى تالاپ ەنگىزىلدى. ناتيجە بويىنشا زارداپ شەككەن ادامنىڭ بۇزىلعان قۇقىعى قالپىنا كەلتىرىلدى»، – دەدى  تۇركسىب اۋدانىنىڭ پروكۋرورى ايبەك بارپىبايەۆ.