كاسىپكەرلەرگە تاۋار بەلگىلەرىن تىركەۋ نە ءۇشىن قاجەت، تىركەۋدىڭ وندىرۋشىلەر مەن پايدالانۋشىلارعا قانداي پايداسى بار، وسى جانە باسقا دا سۇراقتارعا وڭىرلىك كوممۋنيكاسيالار قىزمەتىنىڭ الاڭىندا وتكەن بريفينگ بارىسىندا الماتى قالاسى ادىلەت دەپارتامەنتىنىڭ وكىلدەرى جاۋاپ بەردى، دەپ حابارلايدى Almaty-akshamy.kz.
«زياتكەرلىك مەنشىكتى قورعاۋدىڭ ماڭىزدى اسپەكتىلەرىنىڭ ءبىرى – تاۋار بەلگىلەرىن قورعاۋ. تاۋار بەلگىلەرىن تىركەۋ جانە قورعاۋ زاڭناماعا جانە حالىقارالىق كەلىسىمدەرگە سايكەس جۇزەگە اسىرىلادى. اۋماقتىق ادىلەت ورگاندارى تىركەلگەن تاۋار بەلگىلەرىن زاڭسىز پايدالانۋدىڭ جولىن كەسۋدە جانە قۇقىق يەلەرىنىڭ قۇقىقتارى مەن مۇددەلەرىن قورعاۋدا ماڭىزدى ءرول اتقارادى. ساۋدا بەلگىلەرى تۇتىنۋشىلار ءۇشىن ۇلكەن ماڭىزعا يە، ويتكەنى ولار تاۋارلاردى تاڭداۋدا نۇسقاۋلىق رەتىندە قىزمەت ەتەدى جانە بەلگىلى ءبىر ساپا مەن سەنىمدىلىكپەن بايلانىستى. ولار سونداي-اق وندىرۋشىلەرگە ءوز تاۋارلارىن نارىقتا تانۋعا جانە ماركەتينگتىك ستراتەگيالاردى قۇرۋعا كومەكتەسەدى»، - دەدى الماتى قالاسى ادىلەت دەپارتامەنتىنىڭ زياتكەرلىك مەنشىك قۇقىعى ءبولىمىنىڭ باسشىسى ەركەبۇلان جەتپىسبايەۆ.
سپيكەر قازىرگى ۋاقىتتا تاۋار بەلگىلەرىنىڭ فۋنكسيالارى كونترافاكتىلىك ونىمدەردىڭ تارالۋىنا جانە باسقا ادامداردىڭ بەلگىلەردى تەرىس پايدالانۋىنا بايلانىستى ءجيى بۇزىلاتىنىن ايتىپ، تولىقتىردى. بۇل ەكونوميكا مەن تۇتىنۋشىلارعا تەرىس اسەر ەتەدى.
«تاۋار بەلگىلەرىن قۇقىقتىق قورعاۋ تەك وندىرۋشىلەر ءۇشىن عانا ەمەس، سونىمەن قاتار تۇتىنۋشىلاردىڭ مۇددەلەرىن قورعاۋ ءۇشىن دە ماڭىزدى. ول بەيىندىك زاڭدارمەن جانە حالىقارالىق شارتتارمەن رەتتەلەدى. ادىلەت ورگاندارى زاڭناماعا سايكەس تاۋار بەلگىلەرىنىڭ پايدالانىلۋىن مەملەكەتتىك باقىلاۋ فۋنكسيالارىن ورىندايدى جانە ولاردىڭ زاڭدى پايدالانىلۋىن قامتاماسىز ەتۋ ءۇشىن تەكسەرۋلەر جۇرگىزەدى. الماتى قالاسىنىڭ ادىلەت دەپارتامەنتى جەكە جانە زاڭدى تۇلعالاردىڭ تاۋار تاڭبالارىن جانە باسقا دا زياتكەرلىك مەنشىك وبەكتىلەرىن پايدالانۋ ەرەجەلەرىنىڭ ساقتالۋىنا تەكسەرۋلەردى بەلسەندى جۇزەگە اسىرادى»، - دەپ ءبولىستى الماتى قالاسى ادىلەت دەپارتامەنتىنىڭ باسپا ءسوز حاتشىسى الماس بەكبوتايەۆ.
وسى سالاداعى قۇقىق بۇزۋشىلىقتارعا كەلەتىن بولساق، جىل باسىنان بەرى دەپارتامەنتپەن 5 ملن تەڭگەدەن استام سوماعا 6 788 مىڭ كونترافاكتىلىك ءونىمدى الىپ قويۋ بويىنشا 16 اكىمشىلىك ءىس قوزعالدى. ونىڭ ىشىندە جالپى سوماسى 4،5 ملن تەڭگەدەن اساتىن 5 862 بىرلىگى تاركىلەندى. سالىنعان ايىپپۇلدار سوماسى 900 مىڭ تەڭگەنى قۇرادى.
مەملەكەتتىك كىرىستەر دەپارتامەنتى جانە قۇقىق يەلەنۋشىمەن بىرلەسىپ تاۋارلاردى قازاقستان رەسپۋبليكاسىنىڭ اۋماعىنا زاڭسىز اكەلۋگە جول بەرىلمەدى. مىسالى، قۇقىق يەلەرىنىڭ كەلىسىمىنسىز جالپى سالماعى 5،5 توننا بولاتىن كىر جۋعىش ۇنتاقتىڭ 1640 قاپتاماسىن جانە 600 دانا قىرىنۋ ستانوكتارىن اكەلۋ توقتاتىلدى.
«دەپارتامەنتتىڭ كۇش-جىگەرى قۇقىق يەلەنۋشىلەردىڭ مۇددەلەرىن قورعاۋعا جانە كاسىپكەرلەردى قولداۋعا باعىتتالعان. ماقساتى قۇقىق يەلەنۋشىلەردىڭ قۇقىقتارى مەن زاڭدى مۇددەلەرىنىڭ ساقتالۋىن قامتاماسىز ەتۋ، تۇتىنۋشىلاردى كونترافاكتىدەن قورعاۋ جانە نارىقتا ادال باسەكەلەستىكتى قولداۋ»، - دەپ اتاپ ءوتتى سپيكەر.
تاۋار بەلگىسىن تىركەۋ ءۇشىن اۆتورلىق قۇقىق يەسى ۇلتتىق زياتكەرلىك مەنشىك ينستيتۋتىنا qazpatent.kz. رەسمي سايتى ارقىلى جۇگىنۋى كەرەك. تاۋار تاڭباسىن تىركەۋ پروسەسى 7 ايعا دەيىن سوزىلۋى مۇمكىن. پروسەسس بۇرىننان بار ساۋدا بەلگىلەرىنە ۇقساستىقتى تالداۋدى جانە جالپى قابىلدانعان ەرەجەلەر مەن نورمالاردى تەكسەرۋدى قامتيدى. ايتا كەتۋ كەرەك، تاۋار تاڭباسىن قورعاۋ ول تىركەلگەن اۋماقتا عانا قولدانىلادى.