ىرىكتەۋ كەزەڭىنە 112 بالا قاتىستى، ونىڭ 59-ى جارتىلاي فينالعا ءوتتى
Astana Piano Passion رەسپۋبليكالىق جاس پيانيستەر بايقاۋىنىڭ جەڭىمپازدارى ماراپاتتالدى. كونكۋرسقا 7 - 17 جاس ارالىعىنداعى جاس تالانتتار قاتىستى، دەپ حابارلايدى Almaty-akshamy.kz.
بايقاۋ قورىتىندىسى بويىنشا الماتى قالاسىنان كەلگەن 15 جاستاعى جۇلدىز ەرجەڭىس Astana Piano Passion گران-پري يەگەرى اتانىپ، 3 ملن تەڭگە جەڭىپ الدى. سونداي-اق وعان «استانا وپەرا» تەاترىنىڭ كامەرالىق زالىندا جەكە كونسەرت ۇيىمداستىرۋعا نەمەسە الەمگە ايگىلى ماەسترو الان بورىبايەۆتىڭ جەتەكشىلىگىمەن سيمفونيالىق كونسەرتكە قاتىسۋعا مۇمكىندىك بەرىلدى.
«مادەنيەت سالاسىنداعى ماڭىزدى باعىتتاردىڭ ءبىرى – ەلىمىزدەگى جاس تالانتتاردى قولداۋ، ولاردىڭ شىعارماشىلىعىنا جول اشۋ. بۇگىن جەڭىمپاز اتانعان ۇل-قىزدارىمىز بولاشاقتا الەم ساحنالارىن باعىندىرا الاتىنىنا سەنىمدىمىن. الداعى ۋاقىتتا ءىس-شارا اۋقىمىن بۇدان دا كەڭەيتۋىمىز كەرەك. سەبەبى مۋزىكادا شەكارا بولمايدى، كەز كەلگەن اۋەننىڭ ءتىلى بارشا حالىققا ورتاق. بۇگىن ماراپاتقا يە بولعان جەڭىمپازداردى شىن جۇرەكتەن قۇتتىقتايمىن»، - دەدى مادەنيەت جانە سپورت ءمينيسترى داۋرەن ابايەۆ گالا-كونسەرتتە.
ىرىكتەۋ كەزەڭىنە 112 بالا قاتىستى، ونىڭ 59-ى جارتىلاي فينالعا ءوتتى. قازىلار القاسى ەلىمىزدىڭ بارلىق وبلىس ورتالىقتارىنا بارىپ ىرىكتەۋ تۋرلارىن جانە بالالارعا ارنالعان شەبەرلىك ساباقتارىن وتكىزدى. قازىلار القاسى قۇرامىندا ەلىمىزدىڭ كورنەكتى مادەنيەت جانە ونەر قايراتكەرلەرى، سونداي-اق فورتەپيانو ونەرى سالاسىنداعى حالىقارالىق بايقاۋلاردىڭ لاۋرەاتتارى بولدى.
بايقاۋ قورىتىندىسى بويىنشا جاس ەرەكشەلىگىنە سايكەس ءۇش توپ اراسىندا I، II جانە III ورىن يەگەرلەرى انىقتالدى. ۇزدىك مۋزىكانتتارعا اقشالاي سەرتيفيكاتتار تابىستالدى.