الماتىلىق جىگىت قارت كىسىنى ورتتەن قۇتقاردى

تەك كومەكتەسكىسى كەلگەن.

 الماتىنىڭ 30 جاستاعى تۇرعىنى ەركەبۇلان جاناحمەتوۆ ءوز ءومىرىن قاۋىپكە تىگىپ، ورتەنگەن ءۇيدىڭ ىشىندە قالىپ قويعان قارت ادامدى قۇتقاردى، دەپ حابارلايدى Almaty-akshamy.kz قازاقپاراتقا سىلتەمە جاساپ.

الماتى قالالىق توتەنشە جاعدايلار دەپارتامەنتى 20 قاراشادا تاڭعى 05:20-دا ناۋرىزباي اۋدانىنىڭ "شۇعىلا سيتي" 340/ 4 تۇرعىن ءۇي كەشەنىنىڭ پاتەرى ورتەنگەنىن حابارلادى.

«وقيعا ورنىنا جەتكەن ساتتە توعىز قاباتتى تۇرعىن ءۇيدىڭ ءبىرىنشى قاباتىندا ورنالاسقان پاتەردىڭ جيھازدارى مەن مۇلىكتەرىنىڭ 16 شارشى مەتر اۋماعى ورتەنگەنى انىقتالدى. قاتتى ءتۇتىن سالدارىنان تۇرعىنداردىڭ ءومىرى مەن دەنساۋلىعىنا ءقاۋىپ ءتوندى. گاز بەن تۇتىننەن قورعاۋ قىزمەتى پاتەرلەردە قالعان تۇرعىنداردى ەۆاكۋاسيالاۋعا جانە ءورتتى سوندىرۋگە كىرىستى. قابىلدانعان شارالاردىڭ ارقاسىندا ءورت 10 مينۋتتان سوڭ وقشاۋلانىپ، تاڭعى 5:47-دە تولىق ءسوندىرىلدى»، - دەپ حابارلادى تجد.

سونداي-اق تجد-نىڭ مالىمەتىنشە، ءورت ءسوندىرۋ بولىمشەلەرى كەلگەنشە وسى تۇرعىن ءۇي كەشەنىنىڭ 30 جاستاعى تۇرعىنى ەركەبۇلان جاناحمەتوۆ ءوز ءومىرىن قاتەرگە تىگىپ، وپەراسيادان كەيىن وزدىگىنەن قوزعالا المايتىن قارت كىسىنى ورتتەن قۇتقارعان.

ەركەبۇلاننىڭ ايتۋىنشا، ول ءبىرىنشى قاباتتاعى پاتەرىندە وتىرىپ كومەك سۇراعان داۋىستى ەستىگەن. 72 جاستاعى ەر ادام پاتەرىنىڭ كىرەبەرىسىنە جاقىنداپ، پاتەردەن كەتۋگە تىرىسقان.

«تاڭعا قاراي ۇيقىم كەلمەي، تەرەزەنى اشتىم. سول ساتتە كورشى كورپۋستان شىعىپ جاتقان ءورتتى بايقاپ، ادامدارعا كومەكتەسۋ ءۇشىن سول جەرگە جۇگىردىم. الدىمەن گاز قۇبىرىنىڭ قاقپاعىن جاپتىم. كورشى جىگىت نەمەسە كۋاگەر سىرتقى ەسىكتى تاسپەن تىرەپ، كىرەبەرىستىڭ ەسىگىن اشتى. ءتۇتىن باسقان كىرەبەرىستەن بىرەۋدىڭ كومەك سۇراعان ءالسىز داۋىسىن ەستىدىم. سىرتقا شىعىپ كۋاگەرلەرگە بىرگە كىرۋدى سۇرادىم. ءبىراق، ەشكىم بارمادى. كىرەبەرىستە دەم الۋ مۇمكىن ەمەس بولدى. مۇرنىمدى كەپكامەن جاۋىپ، ورتەنگەن پاتەرگە كىرىپ، ول جەردەن قارت كىسىنى ءقاۋىپسىز جەرگە شىعاردىم. باتىر اتانۋ مەنىڭ ماقساتىم ەمەس، تەك كومەكتەسكىم كەلدى»، - دەدى ەركەبۇلان جاناحمەتوۆ.