وڭتۇستىك استاناداعى ورتالىق قالالىق كلينيكالىق اۋرۋحاناعا اسا اۋىر حالدە 68 جاستاعى ەر ادام جەتكىزىلدى.
تەكسەرە كەلە دارىگەرلەر اتەروسكلەروز سالدارىنان ونىڭ اياعىنداعى كۇرەتامىرلارى زاقىمدانعانىن، سانداعى كۇرەتامىردا قان اينالىسى بۇزىلعانىن انىقتادى، دەپ حابارلايدى Almaty-akshamy.kz.
سونىمەن قاتار، اياق تىندەرىنە مۇلدە قان بارماي قالعاندىقتان باشپايلارى جانسىزدانىپ، گانگرەنا پايدا بولعان پاسيەنتكە اياقتىڭ 4-دەڭگەيلى يشەمياسى دەگەن دياگنوز قويىلدى.
ادەتتە، مۇنداي جاعدايلاردىڭ 35 پروسەنتىندە اياقتى جامباستان تومەن كەسىپ تاستاۋعا تۋرا كەلسە، 18% جاعدايدا سوڭى ادام ولىمىمەن اياقتالادى. اياعى كەسىلگەن پاسيەنتتەردىڭ 9-21%ء-ى ومىرمەن قوش ايتىسسا، 45%-ى ورتا ەسەپپەن بەس-اق جىل ءومىر سۇرەدى. قالعان پاسيەنتتەر ءومىر بويى مۇگەدەك ارباعا تاڭىلادى.
ورتالىق قالالىق كلينيكالىق اۋرۋحانا دارىگەرلەرى يننوۆاسيالىق وتا جاساپ، ەندوۆاسكۋليارلى كاتەتەرلىك ادىسپەن پەريفەريالىق كۇرەتامىرلارداعى تۇيىنشەكتەردى الىپ تاستادى. وپەراسيا مىندەتتى الەۋمەتتىك مەديسينالىق ساقتاندىرۋ قاراجاتى ەسەبىنەن جاسالدى.
جۇرەك-قان تامىرلارى اۋرۋلارىن يننوۆاسيالىق ەمدەۋ ءتاسىلى رەنتگەندى وتا زالىندا ناۋقاستى ۇيىقتاتپاي، جەرگىلىكتى جانسىزداندىرۋ ارقىلى جۇرگىزىلەدى.
«ءبىر ساعاتقا سوزىلعان وپەراسيا ءساتتى اياقتالدى. ءبىز HawkOne اپپاراتىنىڭ كومەگىمەن ەندوۆاسكۋليارلى اتەرەكتوميا دەپ اتالاتىن وتا جاسادىق. بۇل وپەراسيادان كەيىن پاسيەنت تەز ايىعادى، ۇزاق ۋاقىت بويى ستاسيوناردا جاتىپ ەمدەلۋ قاجەت بولمايدى. البەتتە، جاڭا قۇرالدار مەن قوندىرعىلار جۇمىستى جەڭىلدەتىپ جاتىر. ءبىزدىڭ اۋرۋحانا دا زامان كوشىنەن قالماي دامىپ كەلەدى. بۇل ادام ءومىرىن ساقتاپ قالۋ مۇمكىندىگىن ارتتىرىپ، قان تامىرىنداعى كوپتەگەن پاتولوگيالاردى ەمدەۋگە كومەكتەسەدى»، - دەيدى قان-تامىر حيرۋرگى سۇلتان يلييەۆ.
تامىر ءىشى اتەرەكتومياسى ماگيسترالدى قان تامىرلارى اتەروسكلەروزبەن زاقىمدانعان ناۋقاستاردى ەمدەۋدەگى ەڭ ءتيىمدى تاسىلدەردىڭ ءبىرى. ول ەندوۆاسكۋليارلىق ادىستەردى تامىردىڭ تارىلعان ءارى قاتتى زاقىمدانعان تۇستارىندا دا پايدالانۋعا مۇمكىندىك بەرەدى.