الماتىداعى №1 قالالىق كلينيكالىق اۋرۋحانانىڭ امبۋلاتورلىق حيرۋرگيا ورتالىعىندا ءبىر ايدا 20 شاقتى شاعىن وتا جاسالدى
قالالىق كلينيكالىق اۋرۋحانانىڭ امبۋلاتورلىق حيرۋرگيا ورتالىعى ماماندارى 73 جاستاعى زەينەتكەردىڭ موينىنداعى ليپومانى الىپ تاستادى، دەپ حابارلايدى Almaty-akshamy.kz اۋرۋحانانىڭ باسپا ءسوز قىزمەتىنىڭ اقپاراتىنا سۇيەنىپ.
حابارلاماعا سۇيەنسەك، پاسيەنتتىڭ جەلكەسىندەگى ىسىك جيىرما جىلدان استام ۋاقىت بۇرىن پايدا بولعان.
«تومپايىپ كوزگە قوراش كورىنەتىنى بولماسا ەش اۋىرعان جوق. بۇرىن ءتۇرلى سەبەپتەرمەن وتا جاساتا الماي ءجۇردىم. جاقىندا تانىستاردان ىسىكتى مىندەتتى الەۋمەتتىك مەديسينالىق ساقتاندىرۋ ەسەبىنەن تەگىن جاساتۋعا بولاتىنىن ەستىپ، اۋرۋحاناعا كەلدىم»، - دەيدى زەينەتكەر.
پاسيەنتكە امبۋلاتوريا دەڭگەيىندە جوسپارلى وتا جاسالدى. جەرگىلىكتى جانسىزداندىرۋ ارقىلى جاسالعان شاعىن حيرۋرگيالىق مانيپۋلياسيا 20 مينۋتتا اياقتالدى. وپەراسيانىڭ ورنىندا بىلىنەر-بىلىنبەس تىرتىق قالدى.
ورتالىق جەتەكشىسى مارات مەناياقوۆتىڭ ايتۋىنشا، وپەراسيا جاساۋ ءۇشىن بەلگىلى ءبىر اناليزدەر مەن تەكسەرۋ ناتيجەلەرى تالاپ ەتىلەدى. قاجەتتى ساراپتامالاردان كەيىن پاسيەنتكە بىردەن وتا جاسالادى. ياعني، ول ءۇشىن اۋرۋحاناعا جاتىپ ەمدەلۋدىڭ قاجەتى جوق.
«پاسيەنتتىڭ موينىنداعى ىسىكتەن بيوپسيا الىندى. ناتيجەسىندە ونىڭ مايدان تۇزىلگەن ليپوما ەكەنى انىقتالدى. جالپى، مۇنداي ىسىكتەرگە وتا جاسالعاننان كەيىن پاسيەنت بىرنەشە ساعاتتان سوڭ ۇيىنە قايتادى. سودان سوڭ ەكى كۇندە ءبىر رەت جاراسىن تاڭدىرۋعا كەلىپ تۇرادى. تىگىستىڭ ءجىبى 10-12 كۇننەن كەيىن الىنادى»، - دەدى حيرۋرگ.
الايدا، ماماندار ونىڭ ءارتۇرلى فاكتورلار سالدارىنان قاتەرلى ىسىككە اينالىپ كەتۋى ابدەن مۇمكىن ەكەنىن ايتادى. سوندىقتان مۇنداي ىسىكتەردى دەر كەزىندە الىپ تاستاعان ءجون.
№1 قالالىق كلينيكالىق اۋرۋحانا جانىنداعى امبۋلاتورلىق حيرۋرگيا ورتالىعىندا اشىلعالى بەرى ءبىر ايعا جۋىق ۋاقىت ىشىندە وسىعان ۇقساس 20 شاقتى شاعىن وتا جاسالدى. حيرۋرگيالىق كومەك مىندەتتى الەۋمەتتىك مەديسينالىق ساقتاندىرۋ شەڭبەرىندە جانە اقىلى نەگىزدە كورسەتىلەدى. حيرۋرگتەر ليپوما، اتەروما، گيگروما سىندى تاعى دا باسقا ءقاۋىپسىز ىسىك تۇرلەرىنە، شاپتاعى جانە كىندىك تۇسىنداعى جارىقتارعا وپەراسيا جاسايدى، ۆاريكوزدى ەمدەيدى.
«امبۋلاتورلىق حيرۋرگيا ورتالىقتارى ازاماتتار ءۇشىن وتە ىڭعايلى. پاسيەنت مۇنداي ورتالىقتاردا وتا جاساتۋ ءۇشىن اسا كوپ اناليز تاپسىرمايدى. ونىڭ ۇستىنە، ساقتاندىرىلعان ازاماتتار ءتيىستى ساراپتامالاردى تىركەلگەن ەمحانا ارقىلى تاپسىرىپ، ينسترۋمەنتالدىق زەرتتەۋلەردەن دە ءمامس شەڭبەرىندە وتە الادى»، - دەيدى مەديسينالىق ساقتاندىرۋ قورىنىڭ الماتى قالالىق فيليالى ديرەكتورى تىلەۋحان ابىلدايەۆ.