جەدەل جاردەم بريگاداسى الماتى قالالىق جەدەل شۇعىل كومەك كورسەتۋ اۋرۋحاناسىنىڭ قابىلداۋ بولىمىنە اۋىر جاعدايدا 43 جاستاعى ايەلدى جەتكىزدى.
قابىلداۋ بولىمىندە ناۋقاستى كوپبەيىندى توپ قارادى.
اۋرۋحاناعا تۇسكەن كەزدە ايەلدىڭ جاتىرى 13-14 اپتالىق جۇكتىلىككە سايكەس ۇلعايعانى انىقتالعان (11-12 اپتالىق جۇكتىلىككە سايكەس ۇلعايۋ – ۇلكەن ىسىك بولىپ سانالادى). قان كەتىپ، اۋىر انەمياعا ۇشىراعان (گەموگلوبين – 22 گ/ل)، ناۋقاستىڭ جالپى جاعدايى اۋىر بولعان. پاسيەنت دەرەۋ انەستەزيولوگيا، رەانيماسيا جانە قارقىندى تەراپيا بولىمشەسىنە جاتقىزىلعان. نەگىزى ناۋقاسقا 2022 جىلى «جاتىر ميوماسى» دياگنوزى قويىلعان ەكەن.
– پاسيەنتتە گەموگلوبين دەڭگەيى 22 گ/ل، ياعني وتە تومەن بولدى. جاتىر ميوماسى بار ناۋقاستاردا گەموگلوبين دەڭگەيىنىڭ ءتۇسۋىنىڭ نەگىزگى جانە ايقىن سەبەبى – زاقىمدالعان ورگاننان پاتولوگيالىق قان كەتۋ. سوندىقتان ميومامەن اۋىراتىن ناۋقاستاردا پاتوگەنەتيكالىق تەمىرتاپشىلىعى بار انەميانىڭ ەمى – قان كەتۋ كوزىن، ياعني جاتىردى حيرۋرگيالىق جولمەن الىپ تاستاۋ، – دەپ تۇسىندىرەدى اتالعان اۋرۋحانانىڭ گينەكولوگيا بولىمشەسىنىڭ مەڭگەرۋشىسى الما بەكسۇلتانوۆا.
وسىلايشا ا.بەكسۇلتانوۆا جانە دارىگەر-گينەكولوگ ب.قالدىباي پفاننەنشتيل بويىنشا لاپاروتوميا، سول جاق قوسالقىلارىمەن جاتىردىڭ ەكستيرپاسياسى وتاسىن جاسادى. وپەراسيا 2 ساعاتقا سوزىلدى.
وتادان كەيىنگى كەزەڭ اسقىنۋسىز ءوتتى. ايەل ءوزىن جاقسى سەزىنىپ، اۋرۋحانادان ۇيىنە شىعارىلدى.
– ءبىزدىڭ تاجىريبەمىزدە ۇلكەن كولەمدەگى ميوما ءجيى كەزدەسەدى. مۇنداي تۇزىلىمدەر بۇيرەكتىڭ قالىپتى جۇمىسىنا كەدەرگى كەلتىرۋى، جۇقپالى جانە قابىنۋ اۋرۋلارىنىڭ دامۋىنا ىقپال ەتۋى مۇمكىن. اسقورىتۋ جۇيەسىنىڭ جۇمىسى دا بۇزىلۋى مۇمكىن. سونىمەن قاتار، ولار ونكولوگيالىق ءقاۋىپ توندىرەدى. بارلىق ايەلگە پاتولوگيا مەن اۋرۋ بولماعاننىڭ وزىندە كەم دەگەندە جىلىنا ءبىر رەت گينەكولوگ مامانعا كورىنۋ كەرەك ەكەنىن ەسكە سالعىم كەلەدى. قايتالاپ ايتامىن، گينەكولوگقا ۇنەمى قارالىپ، ۋاقىتىندا تەكسەرۋدەن ءوتۋ ماڭىزدى. ويتكەنى ايەل ادام شىدامدى كەلەدى، كوپ اۋرۋ تۋرالى بىلمەۋى جانە ەشقانداي بەلگىنى سەزبەۋى دە مۇمكىن. ال ەگەر سىزدە قانداي دا ءبىر گينەكولوگيالىق اۋرۋ بولسا، وندا مىندەتتى تۇردە دارىگەر ۇسىنعان جۇيەلىلىكپەن تەكسەرىلىپ تۇرۋ كەرەك. ال ەگەر مامان وتا جاساۋدى تالاپ ەتسە، سوزباي ۋاقىتىندا جاساتۋعا ءمان بەرگەن ءجون، – دەيدى الما بەكسۇلتانوۆا.