الەكساندرا اۋىر ەكى جاقتى سۋبتوتالدى ۆيرۋستىق-باكتەريالىق پنيەۆمونيا دياگنوزىمەن №4 قالالىق كلينيكالىق اۋرۋحانادا ەمدەلىپ جاتقاندا ءتورتىنشى بالاسىن دۇنيەگە اكەلدى.
«جۇكتى ايەل باس اۋرۋى، قان قىسىمىنىڭ جوعارىلاۋى، ەنتىگۋ، السىزدىك شاعىمدارىمەن قابىلداۋ بولىمىنە تۇسكەن. وندا ەكى جاقتى سۋبتوتالدى پنيەۆمونيا انىقتالدى. تەراپيەۆتەر كونسۋلتاسياعا گينەكولوگتاردى شاقىردى. ناۋقاستا اۋىر پرەەكلامپسيا دياگنوزى، 26 اپتا جۇكتىلىك مەرزىمى انىقتالدى. ايەل دەرەۋ جانساقتاۋ بولىمىنە جاتقىزىلدى، ودان ءارى ەمدەۋ جانە تەكسەرۋ قاتاڭ تۇردە جانساقتاۋ بولىمىندە جۇرگىزىلدى، سوندا كلينيكالىق، زەرتحانالىق جانە اسپاپتىق تەكسەرۋلەر جۇرگىزىلدى، بىرنەشە جالپى قالالىق كونسيليۋم وتكىزىلدى»، - دەيدى الماتى №4 قالالىق كلينيكالىق اۋرۋحانا گينەكولوگ دارىگەرى انجەلا ۋماركۋلوۆا.
قالالىق كونسيليۋم ناۋقاستى الداعى 48 ساعات ىشىندە كەسار تىلىگى ارقىلى بوساندىرۋ تۋرالى شەشىم قابىلدادى. مامانداردىڭ الدىندا ناۋقاس پەن ونىڭ بالاسىن امان الىپ قالۋ مىندەتى تۇردى.
وسى ماقساتتا №2 پەريناتالدىق ورتالىقتان اكۋشەرلىك-نەوناتالدىق بريگادا شاقىرىلدى. كەسار تىلىگى №4 قالالىق كلينيكالىق اۋرۋحانانىڭ وتالىق بولىمدەرىنىڭ بىرىندە جاسالدى.
سالماعى 1 كگ 400 گ قىز بالا دۇنيەگە كەلدى، نارەستەنى نەوناتالدىق بريگادا قابىلداپ، جاڭا تۋعان نارەستەلەرگە ارنالعان ارنايى ينكۋباتوردا بالانى ودان ءارى كۇتۋ ءۇشىن پەريناتالدى ورتالىققا جەتكىزدى.
«بوسانعان ايەلدىڭ جاعدايى وتە اۋىر دەپ باعالانىپ، ول ودان ءارى ەمدەلۋ ءۇشىن №4 قالالىق كلينيكالىق اۋرۋحانادا قالدىرىلدى. مۇندا ناۋقاس 12 كۇن بولدى. وسى ۋاقىت ارالىعىندا كريتيكالىق كورىنىس بىرنەشە رەت قايتالانىپ، رەانيماتولوگتار بارلىق اسقىنۋدى تۇزەتىپ، ونى تۇراقتى جاعدايعا جەتكىزدى. ايەلدىڭ جاعدايى جاقسارىپ، ۇيىنە شىعارىلدى»، - دەپ اتاپ ءوتتى №4 قالالىق كلينيكالىق اۋرۋحانانىڭ گينەكولوگى انجەلا ۋماركۋلوۆا.
كوپبەيىندى ستاسيوناردا بوسانۋ ستاندارتتى جاعدايعا جاتپايدى، ءسابي اكۋشەرلىك كومەك ەرەكشە ۇيىمداستىرىلعان ارنايى جاعدايدا دۇنيەگە كەلۋ كەرەك. الەكساندرانىڭ اۋىر ءحالىن، دياگنوزدىڭ اۋىرلىعىن جانە انا مەن بالانىڭ ومىرىنە تونگەن ءقاۋىپتى ەسكەرگەن دارىگەرلەر اۋرۋحانادا كەسار تىلىگىن جاسادى.
ايەلدىڭ ءومىرى ءۇشىن №4 قالالىق كلينيكالىق اۋرۋحانانىڭ گينەكولوگتارى، رەانيماتولوگتارى، تەراپيەۆتەرى، حيرۋرگتارى جانە كارديولوگتارى كۇرەستى.
«اۋىر اكۋشەرلىك انامنەز. سوزىلمالى انەميا. اۋرۋحانادان تىس ەكى جاقتى سۋبتوتالدى اۋىر ۆيرۋستى-باكتەريالىق پنيەۆمونيا. تىنىس الۋ جەتكىلىكسىزدىگى. پنيەۆموتوراكس. سوزىلمالى ارتەريالىق گيپەرتەنزيا. جۇرەك جەتكىلىكسىزدىگى. ديففۋزدى توكسيكالىق القىم ءىسۋى. گيپەرتيرەوز. دەكومپەنساسيا. گەستاسيالىق قانت ديابەتى» - بۇل دارىگەرلەردى تىك تۇرعىزعان «توسىنسىيدىڭ» تولىق جيىنتىعى ەمەس.
ءقازىر الەكساندرا مەن ونىڭ ءسابيىنىڭ ءومىرى مەن دەنساۋلىعىنا ەش ءقاۋىپ جوق. №2 قالالىق پەريناتالدىق ورتالىقتىڭ دارىگەرلەرى بالانى شىعارۋعا دايىنداپ جاتىر. تولىق ساۋىعىپ كەتكەن اناسى پەرزەنتحاناعا قىزىنا بارعان.
«ءقازىر مەديسينانى جالقاۋلار عانا سىنامايدى. ال مەن مەنى جانە جاڭا تۋعان قىزىمدى امان الىپ قالعان الماتى دارىگەرلەرىنە راحمەت ايتىپ، شىن جۇرەكتەن العىسىمدى بىلدىرگىم كەلەدى. ماعان ءتورتىنشى كەسار تىلىگىن ەكى تاماشا دارىگەر – №2 قالالىق پەرينالدىق ورتالىق ديرەكتورىنىڭ ەمدەۋ ءبولىمى بويىنشا ورىنباسارى كۋرەنوۆا گۋلنارا بايبۋسىنوۆنا جانە №4 قالالىق كلينيكالىق اۋرۋحاناعا جەتەكشىلىك ەتەتىن قرمۋ پروفەسسورى بودىكوۆ گاني جاندياروۆيچ جاسادى. مەنىڭ مەرزىمىنەن ەكى اي بۇرىن شالا تۋعان، سالماعى 1482 گرامم، قىزىمدى №2 قالالىق پەريناتالدىق ورتالىعىنىڭ نەوناتولوگى سارباس اينۇرىم ءالىپباي قىزى قابىلدادى، ال مەنىڭ ءومىرىم ءۇشىن №4 قالالىق كلينيكالىق اۋرۋحانانىڭ جانساقتاۋ بولىمىندە كۇرەستى جالعاستىرعان ءبولىم مەڭگەرۋشىسى داۋلەتبەكوۆ جاندوس شىمىرتاي ۇلى مەن رەانيماسيا دارىگەرى بولاتوۆ قايرات ادىلبەك ۇلى بولدى. ءوزىمدى جاقسى سەزىنگەن سوڭ گينەكولوگيا بولىمشەسىنىڭ دارىگەرى كيەۆيروۆا زۋحرا تليەۆالدييەۆنانىڭ باقىلاۋىندا بولدىم. ەكى بولەك اۋرۋحانانىڭ دارىگەرلەرىنىڭ بىرلەسكەن ىس-ارەكەتى ۇلكەن ۇيىمداستىرىلعان جۇمىس. №4 قالالىق كلينيكالىق اۋرۋحانا اكىمشىلىگىنە: ديرەكتور دوسمايلوۆ ءبىرجان سەرىكبەكۇلىنا، ونىڭ ورىنباسارلارى بيكونۋروۆ نۇرجان ومار ۇلى مەن رايىمجانوۆ تيمۋر تاحيرۇلىنا ەرەكشە العىسىمدى بىلدىرەمىن.
الەۋمەتتىك جەلى زامانىندا قاتەلەسكەن دارىگەرلەردىڭ اتىن اتاپ، ءار قاتەلىگىن اشىپ جازىپ، ابىرويىن تۇسىرۋدەن قورىقپايمىز! ءبىز قاشان سوڭعى رەت دارىگەردىڭ اۋىر جۇمىسىن باعالاپ، وعان جاي عانا «راحمەت» دەپ ريزاشىلىعىمىزدى بىلدىردىك؟! بىزگە جاقسىلىق جاساعانداردىڭ ءاتى-جونىن بىلە بەرمەيمىز، ءبىراق مەن ادەيى ۋاقىت تاۋىپ، بارلىق قۇتقارۋشىلارىمنىڭ لاۋازىمى مەن ەسىمىن ءبىلىپ الدىم - بۇل العىستىڭ بەلگىسى رەتىندە مەنىڭ قولىمنان كەلەتىن ەڭ ازى»، - دەيدى الماتىلىق الەكساندرا روزدينا.