الماتىلىق دارىگەرلەر جوعارى قاباتتان قۇلاپ كەتكەن ەر ادامدى اياققا تۇرعىزدى

8-قاباتتان قۇلاپ كەتكەن ەر ادام امان قالدى.

وعان دارىگەرلەر بىرنەشە وتا جاسادى، دەپ حابارلايدى Almaty-akshamy.kz.

Massaget.kz اقپاراتىنا سايكەس، 19 جاستاعى جىگىت اۋرۋحانانىڭ قابىلداۋ بولىمىنە اسا اۋىر حالدە جەتكىزىلگەن. ناۋقاس شۇعىل تۇردە جان ساقتاۋ بولىمىنە جاتقىزىلدى. دارىگەرلەر ونىڭ ميى شايقالىپ، جابىق باس-مي جاراقاتى سالدارىنان بىرىنشى-ەكىنشى دارەجەلى تراۆماتيكالىق شوك العانىن جانە كوپتەگەن سۇيەكتەرى سىنعانىن انىقتادى.

ورتالىق قالالىق كلينيكالىق اۋرۋحانانىڭ ورتوپەديا ءبولىمى مەڭگەرۋشىسى قانات تاۋەكەلوۆتىڭ ايتۋىنشا، جان ساقتاۋ ءبولىمى قىزمەتكەرلەرى الدىمەن ناۋقاستى جاراقات سالدارىنان بولعان شوكتان ارىلتتى. جاعدايى تۇراقتانعاننان كەيىن ەكى كۇننەن سوڭ دارىگەرلەر وتا جاساۋ تۋرالى شەشىم قابىلدادى.

«ەكى كەزەڭمەن بىرنەشە وتا جاسالدى. ءبىرىنشى وتا "سىنعان جامباس سۇيەگىن اشىق رەپوزيسيالاۋ، پلاستينامەن جانە بۇراندالارمەن بەكىتۋ" دەپ اتالادى. ناۋقاس ەسىن جيىپ، جاعدايى جاقسارعان سوڭ ەكىنشى وتا جاسالدى. بۇل وپەراسيا بارىسىندا سۇيەك تىندەرىن سىنعان جەردەن بىر-بىرىنە جالعاپ، مەتالل كونسترۋكسيالاردىڭ كومەگىمەن جالعادىق»، – دەيدى قانات تاۋەكەلوۆ.

ماماندار سوزىنە سۇيەنسەك، جوعارى تەحنولوگيالاردىڭ كومەگىمەن جاسالعان وپەراسيا اسا كۇردەلى مانيپۋلياسيالار قاتارىنا جاتادى. مۇنداي وتالار ءمامس پاكەتى شەڭبەرىندە عانا جاسالادى.

«ءبىز ناۋقاستى ەمدەۋ بارىسىندا ونىڭ ءومىرىن ساقتاپ قالۋدى باستى ماقسات ەتىپ قويدىق، – دەيدى قانات تاۋەكەلوۆ. – سونىمەن قاتار مۇگەدەك بولىپ قالماۋى ءۇشىن بارىمىزدى سالدىق. ناتيجەسىندە ءبىز ناۋقاستىڭ ءومىرىن ساقتاپ قانا قويماي، اياققا تۇرعىزدىق»، - دارىگەر.

ناۋقاس وتادان كەيىن ەكىنشى كۇنى-اق اياققا تۇردى. ورتالىق قالالىق كلينيكالىق اۋرۋحانادا رەابيليتاسيادان ءوتتى.