وتكەن ءتۇنى الاتاۋ ادانى اۋماعىندا كۇدىكتى كورىنگەن ەكى Toyota كولىگىنىڭ جۇرگىزۋشىلەرى پوليسيا نازارىنا ىلىكتى.
كۇدىكتىلەردىڭ بىرنەشەۋى بۇرىن ءىستى بولعانى بەلگىلى بولدى، دەپ حابارلايدى Almaty-akshamy.kz.
«ءتارتىپ ساقشىلارىن كورە سالا، جۇرگىزۋشى مەن ونىڭ جولاۋشىلارى جان-جاققا قاشا جونەلگەن. الايدا ولار قولعا ءتۇستى. ولاردىڭ كولىكتەرىن تەكسەرۋ بارىسىندا كولىك ىشىنەن سايگا جانە توز قارۋلارى، پىشاق، تراۆماتيكالىق تاپانشا، وق تابىلىپ، تاركىلەندى. ۇستالعان ازاماتتار الماتى قالاسىنىڭ جانە الماتى وبلىسىنىڭ تۇرعىندارى ەكەندىگى بەلگىلى بولدى. ەڭ جاسى 19-دا بولسا، ۇلكەنى 37 جاستا. قولعا تۇسكەن 8 كۇدىكتىنىڭ ۇشەۋى بۇرىن سوتتى بولعان»، – دەدى الاتاۋ اۋداندىق پوليسيا باسقارماسىنىڭ باستىعى تالعات بەركىنبايەۆ.
اتالعان دەرەك سوتقا دەيىنگى تەرگەۋدىڭ ءبىرىڭعاي تىزىلىمىنە ق ر قك-نىڭ 287-بابى بويىنشا تىركەلدى. ساراپتامالىق زەرتتەۋدىڭ قورىتىندىسىن ەسكەرە وتىرىپ، قىلمىستىق ءىس بويىنشا قاۋلى شىعارىلدى. تەرگەۋ بارىسىندا تاركىلەنگەن قارۋدىڭ شىعۋ تەگى مەن تيەسىلىگى انىقتالاتىن بولادى.
ق ر قپك-نىڭ 201-بابىنا سايكەس وزگە اقپاراتتار تەرگەۋ مۇددەسىنە وراي جاريالاۋعا جاتپايدى. ق ر كونستيتۋسياسىنىڭ 77-بابىنىڭ 3-تارماعىنىڭ 1-تارماقشاسىنا جانە ق ر قپك-نىڭ 19-بابى 1-بولىگىنە سايكەس، زاڭدى كۇشىنە ەنگەن سوت ۇكىمىمەن بەلگىلەنگەنگە دەيىن ءاربىر ادام قىلمىستىق قۇقىق بۇزۋشىلىق جاساۋدا كىناسىز دەپ تانىلادى.