ناۋقاستىڭ ءبىر جىل بۇرىن ءىشى ۇلكەيە باستاپتى.
الماتىلىق دارىگەرلەر ناۋقاستىڭ ىشىنەن سالماعى 2 كەلىدەن اساتىن ىسىكتى الىپ شىقتى، دەپ حابارلايدى Almaty-akshamy.kz قالالىق دەنساۋلىق ساقتاۋ باسقارماسىنا سىلتەمە جاساپ.
قالالىق جەدەل جاردەم اۋرۋحاناسىنا تۇسكەن 52 جاستاعى ەر ادام ءىش قۋىسىنداعى اۋرۋشاڭدىق پەن اۋىرلىق پايدا بولعانىن ايتتى. ال ءبىر جىل بۇرىن ءىشى ۇلكەيە باستادى. ءبىراق وسى ۋاقىتقا دەيىن ىڭعايسىزدىق پەن اۋىرسىنۋ سەزىلمەپتى. سول سەبەپتى مەديسينالىق تەكسەرىسكە بىردەن بارماعان. كومپيۋتەرلىك توموگرافيا ناۋقاستىڭ ىشىندە ۇلكەن ىسىك انىقتالدى.
كونسيليۋمدە ەر ادامعا وتا جاساۋعا شەشىم قابىلداندى. ەكى كەلىدەن اساتىن ىسىكتى الىپ شىعۋعا 2،5 ساعاتتان استام ۋاقىت كەتتى. وتا جاساۋ ءبولىمىنىڭ مەڭگەرۋشىسى نۇركەن جەلدىبايەۆتىڭ ايتۋىنشا، ءىش قۋىسىنان تىس كەڭىستىكتە ورنالاسقان ىسىك بارلىق ورگان مەن ىشەكتى وڭ جاققا ىعىستىرىپ، ءىشتىڭ تەڭ جارتىسىن الىپ جاتتى.
"وپەراسيانىڭ كۇردەلىلىگى ءتۇزىلىمنىڭ ءىش قۋىسىنان تىس كەڭىستىكتە ورنالاسىپ، شاپ ايماعىنا ءوتىپ كەتكەنىندە بولدى. مۇندا ءتۇزىلىمدى تۇتاس الىپ شىعارۋ ماڭىزدى ەكەنىن ايتىپ ءوتۋ كەرەك. سوندىقتان ءبىز شاپ ايماعىنان قوسىمشا تىلىك جاساپ، سان ارتەرياسىنىڭ جانىنان ساننىڭ جوعارعى ۇشتەن ءبىر بولىگىنە دەيىن وتتىك. ونىڭ ۇستىنە ءتۇزىلىم شەكارالارى اورتاعا جاقىن جاتىپ، سول جاق بۇيرەكتىڭ شەكاراسى جانە نەسەپاعاردىڭ بويىمەن كەتكەن. بۇل وتە ءقاۋىپتى بولدى"، - دەيدى نۇركەن جەلدىبايەۆ.
ىسىك 25-30 سانتيمەترگە دەيىن ءوسىپ كەتتى. ال سالماعى 2،240 كەلىگە جەتكەن. 7 كۇننەن سوڭ ناۋقاس ۇيگە شىعارىلدى.
دارىگەرلەر اعزاداعى كەز كەلگەن وزگەرىستەر كەزىندە مەديسينالىق تەكسەرىستەن وتۋگە كەڭەس بەرىپ وتىر.