الماتىدا قوعامدىق دەنساۋلىق ساقتاۋ باسقارماسىنا قاراستى مەديسينالىق ۇيىمدارىنىڭ 27 دارىگەرى قالالىق جوعارى مەديسينالىق كوللەدجى بازاسىندا يزرايلدىك تالىمگەرلەردەن ءبىلىم الىپ، العاشقى كومەك نۇسقاۋشىلارىنىڭ حالىقارالىق سەرتيفيكاتتارىنا يە بولدى.
جەدەل مەديسينالىق جاردەم كەلگەنگە دەيىن دەر كەزىندە كومەك كورسەتۋ داعدىلارىن ۇيرەتۋ كەيىنگى دارىگەرلىك كەزەڭنىڭ تيىمدىلىگىن بىرنەشە ەسە ارتتىرىپ، توتەنشە جاعدايدا زارداپ شەككەندەردىڭ امان قالۋ مۇمكىندىگىن ارتتىرادى، دەپ حابارلايدى Almaty-akshamy.kz.
«وتاندىق جانە شەتەل ماماندارىنىڭ مالىمەتتەرى بويىنشا، توتەنشە جاعداي سالدارىنان زارداپ شەككەندەردىڭ ەداۋىر بولىگى اۋرۋحاناعا دەيىنگى كەزەڭدە ۋاقتىلى جانە ءتيىمدى كومەك كورسەتىلگەن جاعدايدا امان قالۋى مۇمكىن ەدى. دۇنيەجۇزىلىك دەنساۋلىق ساقتاۋ ۇيىمىنىڭ مالىمەتى بويىنشا، اۋىر زاقىمدانۋدان بولاتىن ءولىمنىڭ 50%-ى وقيعا ورنىندا العاشقى سەكۋند پەن مينۋتتا بولادى، ال 30%-ى جاراقات العاننان كەيىنگى العاشقى ەكى ساعاتتا جانە 20%-ى جاراقات العاننان كەيىنگى 5 كۇن ىشىندە قايتىس بولۋى مۇمكىن»، - دەيدى جوعارى مەديسينالىق كوللەدجدىڭ ديرەكتورى ءلاززات اقتايەۆا.
ماماننىڭ ايتۋىنشا، بۇل دەرەكتەردەن زارداپ شەككەندەردىڭ كوپشىلىگى اۋرۋحاناعا دەيىنگى كەزەڭدە قايتىس بولاتىنى كورىنەدى. زارداپ شەككەندەردىڭ جارتىسى مەديسينالىق قىزمەتكەردىڭ كەلۋىنەن بۇرىن قايتىس بولادى، بۇل جاراقات العاننان كەيىنگى العاشقى مينۋتتا كومەك كورسەتۋدىڭ ماڭىزدىلىعىن ايقىندايدى.
بەيبىت ۋاقىتتا تابيعي جانە تەحنوگەندىك سيپاتتاعى توتەنشە جاعدايدىڭ سالدارىنان زارداپ شەككەندەرگە كومەك كورسەتۋدە ەڭ ماڭىزدى ورىن اۋرۋحاناعا دەيىنگى بارابار شارالارعا بەرىلەدى.
«حالىقارالىق ۇلگىدەگى العاشقى مەديسينالىق كومەك، BLS، PHTLS ادىستەرى بويىنشا سەرتيفيكات يەسى اتانعان 27 نۇسقاۋشى العان ءبىلىمىن تاجىريبەدە قولدانۋ مەن ەنگىزۋ ماقساتىندا الماتى قالاسى قوعامدىق دەنساۋلىق ساقتاۋ باسقارماسىنىڭ مەديسينالىق ۇيىمدارىنا كاسكادتىق ادىسپەن كەيىنگى وقىتۋدى جۇرگىزەدى. مەديسينا قىزمەتكەرلەرىن وقىتقاننان كەيىن تاربيەشىلەر، پەداگوگتار، پوليسيا قىزمەتكەرلەرى مەن ءورت سوندىرۋشىلەر اراسىندا وقىتۋ جوسپارلانعان»، - دەپ تولىقتىردى سپيكەر.
وقىتۋ باعدارلاماسىندا ادام ءومىرىن ساقتاپ قالۋ، توتەنشە جاعداي كەزىندەگى اسقىنۋدىڭ الدىن الۋ، سونداي-اق شۇعىل جاعدايدا زارداپ شەككەن ادامنىڭ دەنساۋلىعى مەن ومىرىنە تونەتىن ءقاۋىپتى ازايتۋ ءۇشىن شۇعىل بازالىق ءىس-شارالار كەشەنىنە باسا نازار اۋدارىلدى.
وقىتۋدى جۇرگىزگەن سپيكەرلەر: باس نۇسقاۋشى، شۇعىل كومەك كورسەتۋ بويىنشا وقىتۋ باعدارلامالارىنىڭ جەتەكشىسى – ۆيكتور ياسكيۆ، جاراقات جانە شۇعىل كومەك كورسەتۋ جونىندەگى اعا نۇسقاۋشى – ناتاليا زلوتنيك، بالالار شۇعىل مەديسينالىق كومەك جونىندەگى اعا نۇسقاۋشى، رەانيماسيا بولىمشەسىنىڭ رەانيماسيالىق ءىس-شارالار جونىندەگى ۇيلەستىرۋشىسى – رومان دروبيسكي.
