28 جاستاعى جاس ايەل جەتىنشى اۋرۋحاناعا ءجىتى پانكرەنەكروز جانە ءىسىنۋ بەلگىلەرىمەن جەدەل تۇردە جەتكىزىلگەن. ءوزىنىڭ ايتۋىنشا، ۇنەمى وڭ جاق قابىرعاسىنىڭ استى اۋىرعان. بۇعان دەيىن بىرنەشە رەت اۋرۋى اسقىنىپ، وڭ جاق قابىرعاسىنىڭ استى تارتىپ اۋىرعان. ءبىراق ۋلترادىبىستىق زەرتتەۋ مەن ماگنيتتى-رەزونانستىق توموگرافيا وتتە تاس جوق دەگەن قورىتىندى شىعارىپ بەرگەن. كەيىن وتا بارىسىندا ءوت قابىنىڭ كوپ مولشەردە ۇساق تاس پەن قۇمعا تولىپ قالعانى انىقتالعان.
دارىگەرلەر وعان «ءجىتى پانكرەاتيت، وسەپتيكالىق فورماداعى اۋىر پانكرەونەكروز» دەگەن دياگنوز قويدى. كونسيليۋمدا تولىق تەكسەرىپ شىققاننان كەيىن وتا جاساۋ تۋرالى شەشىم قابىلداندى. ءمامس شەڭبەرىندە جاسالعان لاپاروسكوپيالىق وتا بارىسىندا ءوت قابى الىنىپ تاستالدى. دارىگەرلەردىڭ ايتۋىنشا، ۇساق تاستار ءوت جولىنا بايلانىپ، پانكرەاتيتكە ۇقساس سيمپتومدار بەرگەن كورىنەدى.
«كوپتەگەن ادامدار وتىندە ۇساق تاستار بارىن بىلە تۇرا ەمدەلمەيدى، وپەراسيا جاساتۋعا جۇرەكسىنىپ، اۋرۋعا شىداپ جۇرە بەرەدى. سودان سوڭ وسىلاي دەرتى اسقىنىپ، اۋىر جاعدايدا ۇستامامەن اۋرۋحاناعا تۇسەدى. ءبىراق بۇل پاسيەنتتىڭ وتىندە تاس بارى قانشا تەكسەرسە دە بىلىنبەگەن. سەبەبى وتە ۇساق تاستاردى ۋدز مەن مرت/كت اپپاراتتارى كورسەتپەيدى. ءوت قابىن كەسىپ العان كەزدە ىشىنەن قۇم مەن جۇزدەگەن ۇساق تاس توگىلدى. ءبىر جىل ىشىندە 4 رەت اسقىنىپ، وڭ جاق قابىرعاسىنىڭ استى قاتتى تارتىپ اۋىرعان. وسىنىڭ بارىنە سەبەپ بولعان ءوت قابىن الىپ تاستادىق، سوڭعى ەكى ايدا اۋرۋ بەلگىلەرى قايتالانبادى»، — دەيدى №7 قالالىق كلينيكالىق اۋرۋحانانىڭ 2-حيرۋرگيا بولىمشەسى مەڭگەرۋشىسى مۇسا ساحيپوۆ.
بىلىكتى مامانداردىڭ شەبەرلىگىنىڭ ارقاسىندا وپەراسيا ءساتتى ءوتتى. ءقازىر ناۋقاس اۋرۋحانادان شىقتى، جاعدايى جاقسى. پروفەسسور مۇسا ساحيپوۆ مۇنداي جاعدايلاردى بولدىرماس ءۇشىن اۋرۋ بەلگىلەرى بايقالعان ساتتە بىردەن دارىگەرلەر كومەگىنە جۇگىنۋ قاجەتتىگىن ەسكەرتتى.