ماڭعىستاۋ وبلىستىق توتەنشە جاعدايلار دەپارتامەنتىنىڭ باستىعى مۇرات مۇحانوۆ 16 جاستاعى امير ابباسوۆقا قازاقستان رەسپۋبليكاسى توتەنشە جاعدايلار مينيسترلىگىنىڭ «سۋعا باتقاندى قۇتقارعانى ءۇشىن» مەدالىمەن ماراپاتتاپ، ارنايى سىيلىق تابىستادى.
امير ابباسوۆ 16 ماۋسىم كۇنى تەڭىزگە باتىپ بارا جاتىرعان بالانى قۇتقارعان بولاتىن. تەڭىز جاعاسىندا سەرۋەندەپ جۇرگەن 16 جاستاعى امير سۋعا باتىپ بارا جاتقان بالانى كورىپ، ويلانباستان سۋعا سەكىردى. ءوز باسىن قاتەرگە تىككەن امير ابباسوۆ بۇل ەرلىگىن ازاماتتىق بورىشى سانايدى.
الماتىلىق ءجاسوسپىرىمنىڭ ءوزى دە، اتا-اناسى دا اقتاۋدىڭ تۋماسى. جاز ايىندا امير ابباسوۆ اتا-اجەسىنە قىدىرىپ كەلىپ تۇرادى.
«مەن ۇلىمنىڭ بۇل ەرلىگىن ماقتان تۇتامىن. دەگەنمەن سول ساتتە ۇلىمنىڭ ءومىرى ءۇشىن الاڭداعانىم راس. بالامنىڭ ەرلىگىن ەسكەرىپ، ماراپاتتاعان ازاماتتارعا العىسىم شەكسىز. بالالارىمىز امان بولسىن!» - دەدى امير ابباسوۆتىڭ اناسى ساۋلە بەكمۇحاممەتوۆا.