الماتىلىق ازاماتتان قارۋ-جاراق پەن ەسىرتكى تاركىلەندى

 الماتىدا ارنايى ءىس-شارا بارىسىندا ۇيىندە قارۋ-جاراق پەن ەسىرتكى ساقتاعان ازامات ۇستالدى

الماتى «ەسىرتكى بيزنەسىمەن كۇرەس» جوباسى اياسىندا 44 جاستاعى س. ەسىمدى تۇركسىب اۋدانىنىڭ تۇرعىنى ۇستالدى. ول ۇيىندە قارۋ-جاراق پەن ەسىرتكى ساقتاعان ءارى زاڭسىز ەسىرتكى ساتۋمەن اينالىسقان.

«جەدەل دەرەكتەرگە سايكەس، كۇدىكتى ەسىرتكى زاتتارىن، اتاپ ايتقاندا، ماريحۋانانى زاڭسىز ساتۋمەن اينالىسادى. ونىڭ ءۇيىن رۇقسات ەتىلگەن ءتىنتۋ كەزىندە، سارايىندا اسكەري قول گراناتاسىنا ۇقساس زاتتى، ماكاروۆ تاپانشاسىنا ۇقساس قارۋدى، پاترونداردى، ەسىرتكىنى قولدانۋعا ارنالعان ەكى پلاستيك ىدىستى، ىشىندە زاتى بار شىنى تالشىقتى قاپشىق، سونداي-اق وعان ۇقساس زاتى بار ەكى پوليەتيلەن بايلام تابىلىپ، تاركىلەندى. سونىمەن قاتار باقشادان جابايى وسەتىن قاراسورانىڭ ەرەكشە ءيىسى بار جاسىل وسىمدىك زاتى سالىنعان ەكى باقشا ىدىسى تابىلىپ، تاركىلەندى»، – دەدى الماتى قالالىق پوليسيا دەپارتامەنتىنىڭ ەسىرتكى قىلمىسىنا قارسى كۇرەس باسقارماسىنىڭ باستىعى ەرلان الماعامبەتوۆ.

اتالعان دەرەك سوتقا دەيىنگى تەرگەۋدىڭ ءبىرىڭعاي تىزىلىمىنە ق ر قك-نىڭ 297-بابى (ەسىرتكى، پسيحوتروپتىق زاتتاردى، سول تەكتەستەردى وتكىزۋ ماقساتىندا زاڭسىز دايىنداۋ، قايتا وڭدەۋ، يەمدەنۋ، ساقتاۋ، تاسىمالداۋ، جونەلتۋ نە وتكىزۋ) بويىنشا تىركەلدى.

«ساراپتامالار تاعايىندالدى. ق ر قپك-نىڭ 201-بابىنا سايكەس وزگە اقپاراتتار تەرگەۋ مۇددەسىنە وراي جاريالاۋعا جاتپايدى. ق ر كونستيتۋسياسىنىڭ 77-بابى 3-تارماعىنىڭ 1-تارماقشاسى جانە ق ر قپك-نىڭ 19-بابى 1-بولىگىنە سايكەس، سوت ۇكىمىمەن بەلگىلەنگەنگە دەيىن ءار ادام قىلمىستىق قۇقىق بۇزۋشىلىق جاساۋدا كىناسىز دەپ تانىلادى»، - دەپ حابارلادى پوليسيادان.