الماتىلىق اتا-انالار بالاسىنا ەكپە سالدىرۋعا كەلىسە مە؟

بۇل سۇراققا الماتى قالالىق قوعامدىق دەنساۋلىق ساقتاۋ دەپارتامەنتى باسشىسىنىڭ ورىنباسارى سۆەتلانا سۇلتانعازييەۆا جاۋاپ بەردى.

ونىڭ ايتۋىنشا، 30 مىڭنان اسا الماتىلىق بالاسىنا Pfizer ۆاكسيناسىن سالدىرۋعا كەلىسىم بەرىپ وتىر، دەپ حابارلايدى Almaty-akshamy.kz

سۆەتلانا سۇلتانعازييەۆانىڭ ايتۋىنشا، مەگاپوليستە 12 مەن 17 جاس ارالىعىنداعى 170 مىڭ بالا بار. ونىڭ ىشىندە اتا-انانىڭ 20 پايىزى بالاسىنا Pfizer ۆاكسينا ەگۋگە كەلىسىم بەردى.

«بۇل شامامەن 30 مىڭنان اسا اتا-انا. الايدا بۇل كورسەتكىش وزگەرۋى مۇمكىن، سەبەبى ءسات سايىن كەلىسىم بەرگەندەر ارتىپ جاتىر. ۆاكسينالاۋ الدىمەن مەديسينا مەكەمەلەرىندە جۇرگىزىلەدى. ال ءبىلىم وردالارىنا تەك ارنايى شاقىرتۋ ارقىلى مەديسينا قىزمەتكەرلەرى بارادى» ، - دەدى سۆەتلانا سۇلتانعازييەۆا.

قالادا Pfizer ۆاكسيناسىن سالۋ 12 قاراشادا باستالادى. ءبىرىنشى كەزەكتە 16-17 جاستاعى بالالارعا اتا-اناسى رۇقسات بەرگەننەن كەيىن سالىنادى. ايتا كەتەرى، 10 قاراشادا تۇندە قازاقستانعا Pfizer ۆاكسيناسىنىڭ العاشقى پارتياسى جەتكىزىلدى. الماتى قويماسىندا ۆاكسينانىڭ العاشقى 46 800 دوزاسى، ءبىرىنشى كومپونەنتتىڭ 23 400 دوزاسى جانە ەكىنشىسىنىڭ 23 400 دوزاسى بار. ەكى بولىگىنىڭ اراسى 21-28 كۇن بولۋى كەرەك.