الماتى ماڭىنداعى ساياجايلاردىڭ بىرىندە سينتەتيكالىق ەسىرتكى وسىرەتىن ءىرى زەرتحانا جويىلدى. وقيعا ورنىنان 22 جاسار قىز تۇتقىندالدى، دەپ حابارلايدى اlmaty-akshamy.kz.
ءوڭىر پوليسياسى مەن جەتىسۋ وبلىسى بويىنشا ۇقكد قىزمەتكەرلەرى پروكۋراتۋرانىڭ ۇيلەستىرۋىمەن سينتەتيكالىق ەسىرتكى وندىرەتىن ءىرى ەسىرتكى زەرتحاناسىن جويۋ بويىنشا بىرلەسكەن ارنايى وپەراسيا جۇرگىزگەن.
"جەدەل-ىزدەستىرۋ ءىس-شارالارى بارىسىندا قۇقىق قورعاۋ ورگاندارىمەن الماتى وبلىسى ىلە اۋدانىنىڭ اۋماعىنداعى ساياجاي ۇيىندە سينتەتيكالىق ەسىرتكىنى وندىرۋمەن اينالىسقان 22 جاستاعى الماتىلىق ارۋدى ۇستادى. جاۋاپ الۋ كەزىندە ول جوعارى اقى تولەنەتىن جۇمىستى Telegram كانالى ارقىلى تاپقانى بەلگىلى بولدى"، – دەپ اتاپ ءوتتى جەتىسۋ وبلىسى پد باستىعى سارقىتباي قۇساينوۆ.
ساياجاي ءۇيىن ءتىنتۋ كەزىندە شامامەن 44 كەلى مەفەدرون جانە 2 كەلى "پيرروليدينوۆالەروفەنون – Α-PVP" سينتەتيكالىق زاتى، ەسىرتكى وندىرۋگە قاجەتتى رەاكتيۆتەر مەن قۇرالدار، سونداي-اق 28 مىڭ اقش دوللارى تابىلىپ، تاركىلەنگەن.
"قۇقىق قورعاۋ قىزمەتكەرلەرى 45 كەلى استام سينتەتيكالىق ەسىرتكىنى تاركىلەدى، بۇل ءبىر رەت قولداناتىن 90 مىڭ دوزاعا تەڭ. ونىڭ قۇرامى ءتيىستى ساراپتامامەن راستالدى. ەسىرتكى زاتتارىن زاڭسىز جاساۋ فاكتىسى بويىنشا قىلمىستىق ءىس قوزعالدى. كۇدىكتى قاماۋعا الىندى. تەرگەۋ جالعاسۋدا"، – دەپ تۇيىندەدى س. قۇساينوۆ.
قۇقىق قورعاۋ ورگاندارىنىڭ مالىمەتىنشە، ەسىرتكى قازاقستان اۋماعىندا ساتۋعا ارنالعان.