امەريكاعا بارعان 23 قاريانىڭ ەڭ ۇلكەنى 81 جاستا بولسا، ەڭ كىشىسى الپىستان اسقان.
امەريكادا ونەر كورسەتكەن الماتىلىق قاريالار ەلگە ەرەكشە اسەرمەن ورالدى، دەپ حابارلايدى Almaty-akshamy.kz
الماتىلىق "الاتاۋ ارداگەرلەر ءانسامبلى" امەريكاعا ات ارىتىپ بارىپ، قازاقتىڭ ادەت-عۇرپىن، ءسالت-داستۇرى مەن ونەرىن دارىپتەپ كەلدى. الاتاۋ اۋدانىنىڭ اقساقالدار كەڭەسى قۇرعان حور الماتى وبلىسىنداعى اۋدانداردىڭ ءبارىن ارالاعان.
"قانداي ءىس-شارا بولسا دا قالعان جوقپىز. سپورتتىق جارىستارعا دا قاتىسامىز. جەڭىمپاز اتانىپ، استاناداعى گالا كونسەرتتە دە ونەر كورسەتتىك. ەحرو كورمەسى اشىلعاندا ۇلتتىق كيىممەن بارىپ، شەتەلدەن كەلگەن قوناقتاردىڭ الدىندا ونەر كورسەتتىك، ءارقايسىسىن قوشەمەتپەن قارسى الدىق"، - دەيدى الاتاۋ اۋداندىق اقساقالدار كەڭەسىنىڭ ءتوراعاسى ساعاتۋللا تاۋبالدى.
قاريالار شيراق قيمىلدايدى. ونەرگە دە، ومىرگە دە قۇلشىنىستارى ەرەكشە. مىسالى، 10 سپورت ءتۇرى بولسا، سونىڭ كەم دەگەندە 6 تۇرىنەن قاتىسادى. جاقىندا امەريكاعا دەيىن بارىپ قايتتى.
"بىلتىر قاراشانىڭ 10 كۇنى اقساقالدار كەڭەسى جينالىپ، شەتەلگە شىعايىق دەپ شەشتىك. قاريالار "تۇركياعا بارايىق، وزبەكستانعا بارايىق" دەپ جاتتى. مەن امەريكاعا بارايىق دەپ ەدىم، ءبارى ازىلگە اينالدىردى. ءسويتىپ ۆيزا راسىمدەۋگە كىرىستىم. وڭايعا سوقپادى. الاتاۋ اۋدانى اكىمىنىڭ كومەگى كوپ ءتيدى. جاقسىنىڭ جاقسىلىعىن ايتۋ كەرەك. سودان كونسۋلدىقپەن، سىرتقى ىستەر مينيسترلىگىمەن دە سويلەستىك. ولار امەريكاداعى قازاقستان كونسۋلدىعىنىڭ تەلەفونىن بەردى"، - دەيدى اقساقالدار كەڭەسىنىڭ ءتوراعاسى.
ۆيزانى راسىمدەۋگە ساعاتۋللا اقساقالعا قىزى كومەكتەسكەن.
"حور مۇشەلەرىنە ۆيزانى جەكە-جەكە راسىمدەيىك دەدى. مەن وعان كونبەدىم. ويتكەنى كەيبىرەۋى وتپەي قالۋى مۇمكىن. سودان بىلتىر جەلتوقسان كۇتتىك، قاڭتار، اقپان كۇتتىك، ۆيزا جاسالمادى. ءبىر كۇنى ناۋرىزدا ۆيزا دايىن بولدى دەدى. نەگىزى قارتتاردىڭ ءارقايسىسىنىڭ بالا-شاعاسى كومەكتەستى. نەسيەگە بولسا دا، اتا-انامىزدى امەريكاعا جىبەرەمىز دەپتى"، - دەيدى ساعاتۋللا اتا.
ۆيزاسى دايىن بولعاسىن جۇرەگى ورەكپىگەن قارتتار ءوز ونەرىن كورسەتەتىن جەردى كونسۋلدىق ارقىلى ىزدەيدى. الايدا ساحنا ءتورىن ۇسىنا قوياتىن مادەنيەت وشاقتارى بولا قويمايدى.
"كونسۋلدىقتىڭ ايتۋىنشا، زالعا كورەرمەندى لىق تولتىرۋ قيىن. ويتكەنى ونداعى قازاقتاردىڭ بارلىعى اقشا تابۋ ءۇشىن بارعان. ءار مينۋتى ەسەپتەۋلى، ياعني ءان تىڭداۋعا مۇرشا جوق. سونداي-اق ونداي ساحناسى بار زالداردى جالعا الۋ دا قوماقتى قاراجات ەكەن. جەكە ءوزىم باستاماشى بولعاندىقتان وتە قاتتى ۋايىمدادىم. تاۋلىگىنە نەبارى 3-4 ساعات قانا ۇيىقتايمىن. نامازىمدى وقىپ، اللادان مەدەت سۇرادىم"، - دەيدى كەڭەس ءتوراعاسى ساعاتۋللا اعا.
ساعاتۋللا اعا ءتىپتى امەريكاداعى قازاقتاردىڭ الەۋمەتتىك توبىنا دا قوسىلادى. حوردى سول جەردە دە ناسيحاتتايدى.
"نەگىزى كوبىسى ەسكەرتۋ ايتىپ، تاڭعالىستى: "جاستارىڭ بولسا 70-80-گە كەلدى. جولدا دەنساۋلىقتارىڭ سىر بەرسە، جاعدايلارىڭ نە بولادى" دەدى. ءبىراق شەشىنگەن سۋدان تايىنباس دەپ كەتە باردىق. قاريالار ۇشاقپەن دە ۇشتى، 19 قابات الىپ كەمەگە دە وتىردى، اۆتوبۋسپەن دە ءجۇردى. ەشقايسىسى دەنساۋلىعىنا شاعىم ايتپادى. كەرىسىنشە بارلىعى قولدادى"، - دەيدى ساعاتۋللا تاۋبالدى.
12 كۇن گاسترولدىك ساپاردا 23 قاريا امەريكانىڭ ەڭ كورنەكتى جەرلەرىندە ونەر كورسەتكەن. دامىعان مەملەكەتتىڭ كەي مادەنيەتى قارتتاردىڭ كوزىنە وعاش بولسا، ەندى ءبىر كورىنىسى كوڭىلىنەن شىققان. حالقى كوپ شوعىرلانعان اتاقتى الاڭدارىندا قازاقتىڭ ءانۇرانى مەن ۇلتتىق اندەرى شىرقالعان. كوك تۋى جەلبىرەگەن.
"نيۋ-يوركتىڭ "تايمس سكۆەر"، "ەركىندىك ءمۇسىنى"، "مادام تيۋسسو" الاڭىندا، تاعى باسقا حالىق كوپتەپ جينالعان الاڭداردا ونەر كورسەتتىك. ماقساتىمىز – قازاقتىڭ ونەرىن، ءداستۇرىن كورسەتۋ ەدى. ويلاعان ارمانىمىزعا جەتتىك دەپ ويلايمىن. بارلىعى ونەرىمىزدى ۇيالى تەلەفوندارىنا ءتۇسىرىپ، دۋ قول شاپالاقتاپ، ءتانتى بولىپ جاتتى. قارتتارىمىز دا سوناۋ مۇحيت اسىپ، ەل كورىپ، جاقسى كوڭىل-كۇيدە ورالدى"، - دەيدى الاتاۋ اۋداندىق اقساقالدار كەڭەسىنىڭ ءتوراعاسى.