الماتىلىق ايەلدى كۇيەۋى ۇرىپ ءولتىردى

ول ايەل «اسىلتاۋ» تۇرعىن ءۇي كەشەنىندە تازالىقشى بولىپ جۇمىس ىستەپ جۇرگەن.

«اسىلتاۋ» تۇرعىن ءۇي كەشەندەرىنىڭ بىرىندە ايەل ادامنىڭ ولتىرىلگەنى تۋرالى «نەمولچيKZ» قورىنا الماتىداعى حابارلاما تۇسكەن، دەپ حابارلايدى aqshamnews.kz

قور جەتەكشىسى دينا ءتاڭسارىنىڭ ايتۋىنشا، ايەل عيماراتتاعى 14-15 قاباتتاردى جيناپ، تازالىقشى بولىپ جۇمىس ىستەپ جۇرگەن. تۇرعىن ءۇي كەشەنىنە پوليسيا مەن جەدەل جاردەم ساعات 17:00-دە جەتكەن.

«ءبىزدىڭ الماتىداعى تۇرعىن ءۇي كەشەنىندە تازالىقشى ايەلدى كۇيەۋى ۇرىپ ءولتىردى. بۇل – سۇمدىق. ءبىزدىڭ ەلدە ايەلىن ۇرىپ-سوعىپ ءولتىرۋ سانگە اينالعان سياقتى. قىلمىسكەردى قولعا تۇسىرگەن سەكىلدى. ايەلدىڭ جاسى 45-تە ەدى. ءبىر قىزى بار. مەن ونى كۇندە كورەتىنمىن. سونداي ۇقىپتى ەدى. ەكى ءۇيدى 14-15 قاباتقا دەيىن تاپ-تازا ەتىپ جيناپ شىعاتىن»، -دەپ جازدى تۇرعىنداردىڭ ءبىرى.

بۇگىن الماتى قالالىق پوليسيا دەپارتامەنتى قايعىلى وقيعانى راستاپ، ءىس قوزعالعانىن مالىمدەدى.

«الماتى قالاسىنىڭ پوليسيا دەپارتامەنتى بۇل فاكتى بويىنشا قىلمىستىق ءىس قوزعالعانىن حابارلايدى. كۇدىكتى ءىزىن سۋىتپاي ۇستالىپ، ۋاقىتشا ۇستاۋ يزولياتورىنا جەتكىزىلدى. سوت-مەديسينالىق ساراپتاما تاعايىندالدى»، -دەپ مالىمدەدى ۆەدومستۆو وكىلدەرى.