الماتىلىق ايەل سينتەتيكالىق ەسىرتكى ساتۋمەن اينالىسقان

پوليسيا قىزمەتكەرلەرى 19 مەديسينالىق پيپەتكا مەن شپريس تاركىلەدى

الماتى قالاسى تۇركسىب اۋدانىنىڭ تۇرعىنى ەسىرتكى ءوندىرۋ وشاعىن ۇيىمداستىرعانى ءۇشىن ۇستالدى، دەپ حابارلايدى Almaty-akshamy.kz ءپد-نىڭ باسپا ءسوز قىزمەتىنە سىلتەمە جاساپ.

ەسىرتكىنى ساتىپ العانى جانە ساتقانى ءۇشىن بىرنەشە رەت سوتتى بولعان 39 جاستاعى ب. ەسىمدى ازاماتشا ەسىرتكى ءوندىرۋ وشاعىن ۇيىمداستىرعانى جانە قامتاماسىز ەتكەنى ءۇشىن ۇستالدى. اتالعان دەرەك بويىنشا تۇركسىب اۋداندىق پب تەرگەۋ بولىمىندە ق ر قك-نىڭ 302-بابى 1-بولىگى (ەسىرتكى، پسيحوتروپتىق زاتتاردى، سول تەكتەستەردى تۇتىنۋ ءۇشiن پريتوندار ۇيىمداستىرۋ نەمەسە ولاردى ۇستاۋ جانە وسى ماقساتتار ءۇشiن ءۇي-جايلار بەرۋ) بويىنشا قىلمىستىق ءىس قوزعالدى. 

«ايەل ءۇيىن ناشاقورلارعا بەرىپ، سينتەتيكالىق ەسىرتكى ساتۋمەن اينالىسقان. “سوڭعى ساتىپ الۋدا” كۇدىكتى مەن ونىڭ دوسى تۇراقتى تۇتىنۋشىعا اق ۇنتاقتى جانە ەرەكشە ءيىسى بار پوليەتيلەن بۋماسىن ساتقان. ساراپتاما قورىتىندىسىنا سايكەس، بۇل – سينتەتيكالىق ەسىرتكى»، – دەدى الماتى قالالىق پد ەسىرتكى قىلمىسىنا قارسى كۇرەس باسقارماسىنىڭ باستىعى ەرلان الماعامبەتوۆ. 

ۇستالعان ساتتە ءۇيدىڭ ىشىندە پاتەردىڭ يەسىنەن باسقا ءۇش ەر ادام بولعان. ولار ەسىرتكىگە ماساڭ كۇيدە بولدى. رۇقسات ەتىلگەن ءتىنتۋ كەزىندە پوليسيا قىزمەتكەرلەرى 19 مەديسينالىق پيپەتكا مەن شپريس تاركىلەدى.