الاياقتىعىن جاسىرۋ ءۇشىن پوليسەيلەر ۇرىپ-سوقتى دەپ جالا جاپقان ايەل ۇستالدى
پوليسيا مالىمەتىنشە، الاياقتىق جاسادى دەگەن كۇدىككە 27 جاستاعى ت. ەسىمدى ايەل ىلىكتى. ول پوليسيا قىزمەتكەرلەرى ۇرىپ، كەيىن تۇسىك تاستادىم دەپ وتىرىك ايتقان.
«انىقتالعانداي، ت. ەسىمدى ازامات وتكەن جىلدىڭ جەلتوقسان ايىندا «كرىشا» رەسۋرسىنىڭ سايتىندا وزىندە جوق پاتەردى جالعا بەرۋ تۋرالى حابارلاندىرۋ ورنالاستىردى. بۇل جالعان جارناماعا 26 جاستاعى س. ەسىمدى ازامات سەنىپ قالعان. كۇدىكتى ءوزىن «مارينا» ەسىمدى ريەلتورمىن دەپ تانىستىرعان ت. ەسىمدى ازاماتتىڭ تالابى بويىنشا بانك كارتاسىنا 80 مىڭ تەڭگە الدىن الا تولەم اۋدارعان. قاراجاتتى العاننان كەيىن ت. ەسىمدى ازامات تەلەفون ءنومىرىن ءوشىرىپ، «كليەنتپەن» بايلانىسقا شىعۋىن توقتاتتى»، – دەدى بوستاندىق اۋداندىق پوليسيا باسقارماسىنىڭ باستىعى دۋمان اۋحادييەۆ.
جەدەل-ىزدەستىرۋ شارالارى كەزىندە كارتوچكانىڭ چ. ەسىمدى ازاماتقا تيەسىلى ەكەنى بەلگىلى بولدى. چ. ەسىمدى ازامات تولەم كارتاسىن ت. ەسىمدى تانىسىنىڭ قاراشادان بەرى قولدانىپ جۇرگەنىن ايتتى.
ق ر ءقىلمىستىق-ىس جۇرگىزۋ كودەكسىنىڭ 128 بابىنا سايكەس كۇدىكتى ۋاقىتشا ۇستاۋ يزولياتورىنا قامالدى. ق ر قك-نىڭ 190 بابى بويىنشا قوزعالعان قىلمىستىق ءىس اياسىندا ونىڭ جەكە باسى باسقا دا قىلمىستارعا قاتىسى بار-جوعىنا تەكسەرىلۋدە.