شانحايدا 2025 جىلى 27-29 مامىر ارالىعىندا ءوتىپ جاتقان ITB China 2025 حالىقارالىق تۋريستىك كورمەسىنە الماتى قالاسى قاتىستى. ءىس-شارا قحر ەڭ ءىرى كىرمەلىك تۋريزم پلاتفورمالارىنىڭ ءبىرى، جىل سايىن 800-دەن استام قاتىسۋشى مەن 10 000-نان استام سالا مامانىنىڭ باسىن قوسادى.
الماتىنىڭ كورمە ستەندىندە قالانىڭ تابيعي سۇلۋلىعى مەن مادەني نىساندارى تانىستىرىلدى. كورمەنىڭ ءبىرىنشى كۇنى قوناقتاردى ۇلتتىق كيىم كيگەن قازاق باتىرلارى قارسى الىپ، حالىق اسپاپتار ءانسامبلى «اداي» كۇيى مەن «كوزىمنىڭ قاراسى» ءانى جانە ت.ب. شىعارما ورىندادى. كەلۋشىلەرگە ۇلتتىق تاعامدار ۇسىنىلىپ، ءداستۇرلى قازاق كيىمدەرىن كيىپ كورۋگە مۇمكىندىك بەرىلدى.
كورمەدە قالانى 7 وتاندىق تۋروپەراتور تانىستىردى. قازاقستاندىق جانە شەتەلدىك تۋروپەراتورلار اراسىندا 100-دەن استام B2B كەزدەسۋ وتكىزىلىپ، 30-دان استام ءتۋريستى قابىلداۋ تۋرالى كەلىسىمشارتتار مەن الماتىنى ونلاين كەڭىستىكتە ىلگەرىلەتۋگە باعىتتالعان سيفرلىق پلاتفورمالى مەموراندۋمدارعا قول قويىلدى. بۇل كەلىسىمدەر ىسكەرلىك بايلانىستى نىعايتۋعا جانە الماتىعا تۋريستەر لەگىن ارتتىرۋعا باعىتتالعان حالىقارالىق سەرىكتەستىكتى دامىتۋعا سەپتىگىن تيگىزەدى.
«ءبىز شانحايمەن ارىپتەستىك قارىم-قاتىناستى جوعارى باعالايمىز. بۇل الماتى سەكىلدى ءوز وڭىرىندە ەكونوميكالىق جانە مادەني بايلانىستى قالىپتاستىراتىن ماڭىزدى قالا. 2025 جىلى ءبىزدىڭ قالالار باۋىرلاس قالا بولۋ تۋرالى كەلىسىمگە قول قويماق. بۇل ۇزاق جىلعا جالعاسقان ىنتىماقتاستىقتىڭ زاڭدى جالعاسى. قارىم-قاتىناستى دامىتۋدىڭ كەلەسى قادامى – الماتى مەن شانحاي اراسىندا تىكەلەي اۋە رەيسىنىڭ اشىلۋى بولماق. 2025 جىلى 4 شىلدەدەن باستاپ China Eastern Airlines كومپانياسى تۇراقتى رەيستەردى اشادى. جالپى، قازاقستانداعى جۇڭگو تۋريزم جىلى بولىپ جاريالانعان 2025 جىل بىرلەسكەن جوبالاردى جۇزەگە اسىرۋ، تۋريستىك باعىتتاردى ىلگەرىلەتۋ جانە ءوڭىرارالىق بايلانىستى نىعايتۋ ءۇشىن قوسىمشا مۇمكىندىك بەرەدى»، – دەدى الماتى قالاسى تۋريزم باسقارماسى باسشىسىنىڭ ورىنباسارى عازيز تولەبەك.
كورمە قوناقتارى دا الماتىنىڭ تۋريستىك الەۋەتى تۋرالى ويىن ايتتى.
«الماتى بارعىم كەلەتىن قالانىڭ ءبىرى. شاھار تۋرالى كوپتەگەن جاقسى پىكىر ەستىدىم، بۇل قالا ىسكەرلىك، دەمالىس جانە ەكوتۋريزمدى ۇشتاستىرۋعا تاپتىرماس ورىن سياقتى كورىنەدى»، – دەدى كورمە قوناعى دجون ۆەي.
مۇنىڭ قاجەتتى باعىت ەكەنىن جۇڭگو تۋريستەرىنىڭ الماتىعا دەگەن قىزىعۋشىلىعىنىڭ تۇراقتى ءوسۋى دە دالەلدەيدى. 2024 جىلى الماتىعا 99 مىڭنان استام قحر ازاماتتارى كەلىپ، بۇل كورسەتكىش الدىڭعى جىلمەن سالىستىرعاندا 50%-عا ارتقان.