الماتىعا رەسەيدەن سوعىس ارداگەرلەرىنىڭ سۇيەگى اكەلىندى

«اتامنىڭ اماناتى» قوعامدىق بىرلەستىگى وسى ۋاقىتقا دەيىن ۇلى وتان سوعىسى جىلدارى جوعالىپ كەتكەن 1000-نان استام جاۋىنگەردى تاپقان.

اراعا 80 جىل سالىپ، ەكى سوعىس ارداگەرىنىڭ سۇيەگى رەسەيدەن الماتىعا جەتكىزىلدى، دەپ حابارلايدى Almaty-akshamy.kz.

قان مايداندا جاۋمەن ارپالىسىپ، وتان ءۇشىن قازا بولعانداردىڭ سۇيەگى تۇبىندە ەلگە جەتتى. سولاردىڭ ءبىرى - نيكولاي گۋروۆ ستالينگراد تۇبىندەگى شايقاستا اتتى اسكەردى باسقارىپ، ەرلىكتىڭ ۇلگىسىن كورسەتكەن. الايدا 1942 جىلى حاتى ءۇزىلىپ، حابارسىز كەتكەن.

ال ۆورونەج ماڭىنان تابىلعان تورەگەلدى ۇركىربايەۆتىڭ تۋىستارى بولماعاندىقتان، ونىڭ جەرلەۋ ءراسىمىن جامبىل اۋدانى اكىمشىلىگى ءوز موينىنا العان.      

قۇرىلعانىنا 3 جىل بولعان «اتامنىڭ اماناتى» قوعامدىق بىرلەستىگىنىڭ كومەگىنە 5 مىڭنان استام قازاقستاندىق جۇگىنگەن. ءتىپتى كورشىلەس قىرعىزستان، وزبەكستان، رەسەيدەن تۋىستارىن ىزدەۋشىلەر كوپ حابارلاساتىن كورىنەدى. قىزمەتىنە اقى المايتىن ەرىكتىلەر بۇل مىندەتىن ابىروي سانايدى.  

بيىل ەلگە ۇلى وتان سوعىسىنا قاتىسقان 11 وتانداسىمىزدىڭ سۇيەگى اكەلىنىپ، جەر قوينىنا تاپسىرىلدى. بۇل – بالانىڭ بابا الدىنداعى، تاريح الدىنداعى مىندەتى.