الماتى حالىقارالىق اۋەجايى جاڭا حالىقارالىق جولاۋشىلار تەرمينالىندا العاشقى جولاۋشىلارىن قارسى الدى، دەپ حابارلايدى almaty-akshamy.kz
الماتى حالىقارالىق اۋەجايى جاڭا حالىقارالىق جولاۋشىلار تەرمينالىندا العاشقى جولاۋشىلارىن قارسى الدى. بۇل ماڭىزدى وقيعا 2024 جىلدىڭ 1 ماۋسىمىندا ورىن الدى، العاشقى رەيس رەتىندە Air Astana اۋەكومپانياسىنىڭ KC664 لوندون-الماتى باعىتىمەن كەلگەن ۇشاق ساعات 08:40-تا 94 جولاۋشىمەن قوندى.
جاڭا تەرمينالدان العاشقى ۇشىپ كەتكەن رەيس تە Air Astana اۋەكومپانياسىنا تيەسىلى بولدى. KC653 الماتى-دوحا باعىتىنداعى رەيس ساعات 09:30-دا 166 جولاۋشىمەن ۇشىپ شىقتى. جولاۋشىلاردى الماتى حالىقارالىق اۋەجايىنىڭ باسشىلىعى، الماتى قالاسىنىڭ اكىمدىگى جانە Air Astana اۋە كومپانياسىنىڭ باسشىلىعى قارسى الدى.
الماتى حالىقارالىق اۋەجايىنىڭ پرەزيدەنتى الپ ەر تۋنگا ەرسوي:
«ءبىزدىڭ ساياحاتىمىز 2 جىل بۇرىن ق ر پرەزيدەنتى قاسىم-جومارت توقايەۆتىڭ جاڭا حالىقارالىق جولاۋشىلار تەرمينالىنىڭ قۇرىلىسىنىڭ باستالۋىنا وراي كاپسۋلا سالۋىنان باستالدى. بۇگىن، 2024 جىلدىڭ 1 ماۋسىمىندا، ءبىز ۋادە ەتكەندەي، العاشقى رەيستەردى جاڭا تەرمينالدا قارسى الۋدامىز. بۇگىنگى كۇننىڭ كەستەسى بويىنشا جاڭا تەرمينالدا 5 رەيس ۇشىپ كەلىپ، 4 رەيس ۇشىپ كەتەدى. حالىقارالىق تاجىريبەگە سايكەس ءبىز بارلىق حالىقارالىق رەيستەردى كەزەڭ-كەزەڭىمەن جاڭا تەرمينالعا كوشىرەمىز. حالىقارالىق رەيستەردى تولىعىمەن اۋىستىرۋ ماۋسىم ايىنىڭ ءبىرىنشى ونكۇندىگىندە جۇزەگە اسىرىلادى»، - دەپ مالىمدەدى.
الماتى قالاسى اكىمىنىڭ ورىنباسارى الىشەر ءابدىقادىروۆ:
«الماتى قالاسىنىڭ تۇرعىندارى مەن قوناقتارىن جاڭا حالىقارالىق جولاۋشىلار تەرمينالىنىڭ رەسمي اشىلۋىمەن قۇتتىقتايمىن. ەندى اۋەجاي جىلىنا 14 ميلليون جولاۋشىنى قابىلداي الادى، بۇل بۇرىنعى كورسەتكىشتەن ەكى ەسە كوپ. بيىلعى جىلى ءبىز جولاۋشىلار اعىنىنىڭ 11 ميلليون ادامعا دەيىن ۇلعايۋىن كۇتۋدەمىز. الماتىنىڭ 41 تىكەلەي اۋە قاتىناسى مەن الەمنىڭ 82 ەلىمەن ۆيزاسىز رەجيمى بار ەكەنىن ەسكەرە وتىرىپ، جاڭا حالىقارالىق جولاۋشىلار تەرمينالىنىڭ اشىلۋى اۋەجاي تاريحىنداعى جاڭا كەزەڭدى بەلگىلەيتىنىنە سەنىمدىمىن»، - دەپ اتاپ ءوتتى.
وسى اتاۋلى كۇنى الماتى حالىقارالىق اۋەجايى العاشقى جولاۋشىلارىن تاتتىلەرمەن جانە ەستەلىك سىيلىقتارمەن قارسى الدى. جاڭا حالىقارالىق تەرمينالدى ىسكە قوسۋدىڭ باستاپقى مەرزىمى 2024 جىلدىڭ جازىنىڭ سوڭىنا جوسپارلانعان بولاتىن، ءبىراق جولاۋشىلار اعىنىنىڭ قارقىندى وسۋىنە بايلانىستى جۇمىس جەدەلدەتىلىپ، تەرمينال العاشقى رەيستەردى 1 ماۋسىمنان قابىلداي باستادى.
بارلىق حالىقارالىق رەيستەر تولىعىمەن جاڭا تەرمينالعا اۋىستىرىلعاننان كەيىن، قولدانىستاعى تەرمينال حالىقارالىق ستاندارتتارعا سايكەس جاڭارتىلىپ، ىشكى رەيستەر ءۇشىن پايدالانىلادى.
الماتى اۋەجايىنىڭ جاڭا حالىقارالىق جولاۋشىلار تەرمينالىنا قوش كەلدىڭىز!