الماتىعا بۇگىن تاڭعى ساعات 7-دە Pfizer ۆاكسيناسىنىڭ العاشقى پارتياسى كەلىپ، №7 قالالىق كلينيكالىق اۋرۋحاناعا – 379 مىڭ دوزاسى جەتكىزىلدى. ارنايى تەمپەراتۋرانى ساقتاۋعا مۇمكىندىك بەرەتىن 8 قوراپتان 46 800 دانا امەريكاندىق ۆاكسينا قابىلداندى. ءار كومپونەنت سايكەسىنشە 23 400 دانادان.
«بۇگىن تاڭعى 7-دە اتالمىش ۆاكسينا اەروپورتتان ورتالىق ۆاكسينا قويماسىنا قابىلداندى. وسى جەردەن ەكپە الماتىنىڭ بارلىق اۋرۋحانالارىنا تاراتىلاتىن بولادى. ۆاكسينا تەمپەراتۋرانىڭ بارلىق جاعدايلارىن ەسكەرە وتىرىپ اكەلىندى»، - دەدى قالالىق كلينيكالىق اۋرۋحانانىڭ ەپيدەميولوگيالىق جاعداي مەن ينفەكسيالىق باقىلاۋ جونىندەگى ديرەكتوردىڭ ورىنباسارى ەلۆيرا يبراگيموۆا.
ەپيدەميولوگتىڭ ايتۋىنشا، بارلىق قوراپتار ارنايى تەمپەراتۋرا سەزبەگىمەن جابدىقتالعان. سەزبەك تاسىمالداۋ بارىسىندا باستان اياق قوسۋلى بولعان. ولاردىڭ جۇمىسى تەك ورتالىق قويمادا توقتاتىلدى. ەرجەگە سايكەس ءار قوراپ 5 مينۋتتىڭ ىشىندە اشىلىپ، ۆاكسينا توڭازىتقىشتارعا سالىندى.
بۇعان دەيىن پرەپاراتتى ودان ءارى ساقتاۋ ءۇشىن الماتى قويماسىنا ارنايى ەكى توڭازىتقىش الىنعان. ونداعى تەمپەراتۋرا – 60-90 گرادۋس ارالىعىندا. مۇنىڭ بارلىعى ەكپەنىڭ نۇسقاۋلارعا سايكەس جەتكىزىلگەنىن كورسەتەدى. ەمحانالار ۆاكسينانى ارنايى تەرموقوراپتاردا قابىلداپ، +2 مەن+8 تەمپەراتۋرا ارالىعىنداعى رەجيمدە ءبىر اي ساقتاي الادى.
ۆاكسيناسيا ەڭ الدىمەن مەديسينالىق نىسانداردا، كەيىن ءبىلىم بەرۋ ورتالىقتارىندا جۇرەتىن بولادى. ولاردىڭ قاتارىنا مەكتەپتەر، جوعارى وقۋ ورىندارى، ورتا ءبىلىم بەرۋ ورىندارى كىرەدى. ەكپەنىڭ ءبىرىنشى جانە ەكىنشى كومپونەنتى 21 كۇننەن 28 كۇن ارالىعىنداعى ينتەرۆالمەن سالىنادى.
Pfizer ۆاكسيناسى ەرىكتى تۇردە:
12 جانە ودان جوعارى جاستاعى جاسوسپىرىمدەرگە؛
جۇكتى ايەلدەرگە – جۇكتىلىكتىڭ 16-دان 37ء-شى اپتاسىنا دەيىن؛
لاكتاسيا كەزىندەگى ايەلدەرگە – بوسانعاننان كەيىنگى كەزەڭ اياقتالعاننان كەيىن (42 كۇننەن كەيىن) سالىنادى.
جالپى قازاقستان ارنايى كەلىسىم بويىنشا Comirnaty Pfizer/BioNTech ۆاكسيناسىنىڭ 4 ملن-نان استام دوزاسىن ساتىپ الدى. قالعان پارتيالار كەستە بويىنشا اپتا سايىن ەلىمىزگە جىبەرىلەتىن بولادى.