الماتىدا قىس مەزگىلى ءوز سانىمەن كەلىپ، قالانى اپپاق قار جاپقاندا، بارىنەن بۇرىن الماتى زووباعىنىڭ اق ايۋى پۋرگا ەرەكشە شاتتاندى. سۋىقتى جاقسى كورەتىن الىپ جىرتقىش ءۇشىن بۇل – ناعىز مەرەكە، دەپ حابارلايدى Aqshamnews.kz
تاڭەرتەڭ زووباق قىزمەتكەرلەرى پۋرگامەن كەزدەسۋگە كەلگەندە، ونىڭ كادىمگىدەي كوڭىلدى ەكەنىن بايقادى. ايۋ ۇلكەن اۋلاسىن اينالىپ جۇگىرىپ، قارعا اۋناپ، تاباندارىمەن اپپاق ۇنتاققا ءىز قالدىردى. قار قاباتىن يىسكەپ، ءتىپتى كەي جەرىن تىستەپ تە كوردى.
پۋرگا ءۇشىن بۇل جاي سۋىق اۋا رايى ەمەس، ناعىز ويىن الاڭى. ول قاردى الدىڭعى تاباندارىمەن كوسىتىپ، ۇستىنە دومالاپ، ءوزىنىڭ تابيعي مەكەنىنە ورالعانداي كۇي كەشتى. كەيدە قاردى تۇيىرشىك ەتىپ جيناپ، ونىمەن وينايدى.
اق ايۋلاردىڭ تابيعاتتاعى تىرشىلىك ەتۋ ورتاسى – اركتيكا، سوندىقتان الماتىنىڭ قارلى كۇندەرى پۋرگاعا ەرەكشە قۋانىش سىيلايدى. جازعى اپتاپ ىستىقتا باسسەين سۋىندا سالقىنداپ جۇرسە، قىستا تابيعي سۋىق اۋا رايىنىڭ ءوزى وعان كەرەمەت جايلىلىق اكەلەدى.
زووباق ماماندارىنىڭ ايتۋىنشا، اق ايۋلار – ناعىز قار مەن مۇزدىڭ جانكۇيەرلەرى. سوندىقتان الماتىعا جاۋعان قار – پۋرگا ءۇشىن ەڭ كەرەمەت توسىنسىي بولدى.