اۋە كومپانياسىنىڭ باسپا ءسوز قىزمەتى جولاۋشى اۋەگە كوتەرىلگەننەن كەيىن ەسىن جوعالتقانىن ايتتى.
FlyArystan اۋە كومپانياسىنىڭ قوستانايدان الماتىعا بەت العان ۇشاعىندا ەر ادام قازا تاپتى، دەپ حابارلايدى Almaty-akshamy.kz
"ستيۋاردەسسالار بىردەن جولاۋشىنىڭ تامىر سوعىسى مەن تىنىس الۋىن تەكسەردى، ءبىراق ءومىر بەلگىلەرىن تاپپادى. نۇسقاۋلارعا سايكەس، ەكيپاج العاشقى مەديسينالىق كومەك كورسەتىپ، بورتتاعى دارىگەردى ىزدەۋگە كىرىستى"، دەدى FlyArystan اۋە كومپانياسىنىڭ باسپا ءسوز قىزمەتى.
سودان كەيىن ستيۋاردەسسالار دارىگەرمەن بىرگە دەفيبريللياتور ارقىلى جۇرەك-وكپە رەانيماسياسىن جاسادى.
كومانديردىڭ شەشىمىمەن ۇشاق استانا اۋەجايىنا شۇعىل قوندى.
"اۋە كومپانياسىنىڭ بورتسەرىكتەرى اۋەجايعا كەلگەنشە جۇرەك-وكپە رەانيماسياسىن جالعاستىردى. وكىنىشكە وراي، استانا اۋەجايىنىڭ دارىگەرى جولاۋشىنىڭ قايتىس بولعانىن راستادى. اۋە كومپانياسى جولاۋشىنىڭ تۋىستارى مەن جاقىندارىنا قايعىلارىنا ورتاقتاسىپ كوڭىل ايتادى"، دەلىنگەن FlyArystan اۋە كومپانياسىنىڭ باسپا ءسوز قىزمەتى تاراتقان اقپاراتتا.