بۇل تۋرالى قازاقستانداعى اقش ديپلوماتيالىق ميسسياسى مالىمدەدى.
باس كونسۋل ەركىننىڭ كونسۋلدىق ايماعىنا الماتى جانە شىمكەنت قالالارى، سونداي-اق الماتى، قىزىلوردا، تۇركىستان، جامبىل جانە جەتىسۋ وبلىستارى كىرەدى، دەپ حابارلايدى Almaty-akshamy.kz
"مەن الماتىداعى اقش كونسۋلدىعىنىڭ اتىنان وكىلدىك ەتۋدى ءوزىم ءۇشىن ۇلكەن مارتەبە سانايمىن جانە قازاقستان سياقتى ادەمى ءارى قوناقجاي ەلگە قايتا ورالعانىما وتە قۋانىشتىمىن. الماتى 20 جىل بۇرىن مەنىڭ شەتەلدەگى العاشقى ديپلوماتيالىق ميسسيام بولعان. ەندى الداعى ءۇش جىل بويى بۇل قالانى ءوز ءۇيىم دەپ ساناۋ باقىتىنا يە بولىپ وتىرمىن. سول ۋاقىتتان بەرى كوپ نارسە وزگەرگەن ، سوندىقتان قازاقستاندى جاڭا قىرىنان تانىپ-بىلۋگە اسىقپىن»، - دەدى ەركىن حانىم.
«مەن سىزدەرمەن بىرگە قازاقستاننىڭ ەكونوميكاسىن نىعايتىپ، ءارتاراپتاندىرۋ، وڭىرلىك قاۋىپسىزدىكتى كۇشەيتىپ، مادەني الماسۋدى دامىتۋ ءۇشىن كۇش جۇمىلدىرىپ ەڭبەك ەتەتىن، جانە ەڭ باستىسى، قازاقستاننىڭ ەڭ قۇندى بايلىعى – ونىڭ حالقىمەن يىق تىرەسە جۇمىس ىستەيتىن ساتتەردى قۋانا كۇتەمىن»، - دەپ اتاپ ءوتتى ەركىن حانىم.
ديپلوماتيالىق قىزمەتتەگى 20 جىل بويى ەركىن حانىم الەمنىڭ ءارتۇرلى ەلدەرىن ارالاپ ۇلگەردى. بۇعان دەيىن ول رەيكياۆيكتەگى (يسلانديا) اقش ەلشىلىگىندە ميسسيا باسشىسىنىڭ ورىنباسارى جانە ۋاقىتشا سەنىمدى وكىل قىزمەتتەرىن اتقاردى. ەركىن حانىمنىڭ وعان دەيىنگى ديپلوماتيالىق قىزمەت اتقارعان ەلدەرىنىڭ قاتارىندا پاناما-سيتي (پاناما)، بىشكەك (قىرعىزستان)، سان-سالۆادور (سالۆادور) جانە ماسكەۋ (رەسەي) دە بار. ەركىن حانىم ۆاشينگتون قالاسىندا بىرنەشە رەت قىزمەت اتقاردى، اتاپ ايتقاندا، ەكونوميكالىق جانە ىسكەرلىك ماسەلەلەر بيۋروسى (EB)، قارۋ-جاراقتى باقىلاۋ، كەلىسىمدەردى تەكسەرۋ جانە ورىنداۋ بيۋروسى (AVC) جانە باتىس جارتى شار ىستەرى بيۋروسىندا (WHA) جۇمىس ىستەدى.
ميشەل ەركىن حانىم يەل ۋنيۆەرسيتەتىن رەسەي جانە شىعىس ەۋروپالىق زەرتتەۋلەر ماماندىعى بويىنشا ۇزدىك بىتىرگەن. سودان كەيىن ول ميننەسوتا ۋنيۆەرسيتەتىنىڭ زاڭ مەكتەبىنىڭ يۋريسپرۋدەنسيا دوكتورى (JD) دارەجەسىن الدى.
سولتۇستىك ميننەسوتانىڭ اۋىل شارۋاشىلىعىمەن اينالىسقان ورتاسىنان شىققان ول ءوزىنىڭ اق جەر ودجيبۆە (چيپپيەۆا) تايپاسىنىڭ ۇرپاعى ەكەندىگىن ماقتان تۇتادى. ەركىن حانىم مەن جولداسى جومارت ءتورت بالا تاربيەلەپ وتىر. ورىس جانە يسپان تىلدەرىن جەتىك مەڭگەرگەن، قازاق ءتىلىن دە وقىپ ءجۇر.