الەكسەي بوگدانوۆ ءوز ەركىمەن قازاقستانعا بەرىلگەن.
انتيكوردىڭ مالىمەتىنشە، ول بۇگىن، 15 مامىر كۇنى ق ر ءىىم ينتەرپولىنىڭ كومەگىمەن بوگدانوۆ بريۋسسەل قالاسىنان (بەلگيا) الماتى قالاسىنا كەلدى، دەپ حابارلايدى Almaty-akshamy.kz
ول ءوز ەركىمەن ورالعان سوڭ، سونىمەن قاتار، كىناسىن تولىق مويىنداپ، تەرگەۋمەن ىنتىماقتاستىق ورناتقان سوڭ، وعان قاتىستى بۇرىن سايلانعان قاماۋدا ۇستاۋ تۇرىندەگى بۇلتارتپاۋ شاراسى كەپىلگە وزگەرگەنى بەلگىلى بولدى.
«سىبايلاس جەمقورلىققا قارسى قىزمەتتىڭ باسشىلىعىمەن ۆەدومستۆوارالىق جەدەل-تەرگەۋ توبى «بتا بانكى» اق بۇرىنعى توپ-مەنەدجمەنتىنە قاتىستى ۇيىمداسقان قىلمىستىق توپقۇرامىندا جاسالعان اقشانى، ونىڭ ىشىندە شەتەلدە جىمقىرۋ جانە جىلىستاتۋ فاكتىلەرى بويىنشا قىلمىستىق ءىستى ودان ءارى تەرگەپ جاتىر. قىلمىستىق ءىس بويىنشا 2009 جىلدان بەرى ىزدەۋدە جۇرگەن م.ءابليازوۆتىڭ تاعى ءبىر سىبايلاسى - الەكسەي بوگدانوۆ قازاقستانعا ءوز ەركىمەن قايتارىلدى»، - دەپ حابارلادى انتيكور.
دەرەككوزگە سۇيەنسەك، بوگدانوۆ «Metropolitan Manageres Corp» (BVI) وففشورلىق كومپانياسىنىڭ نومينالدى وكىلى، «بەلوۆود كراحمال كومبيناتى» جاق باسقارما ءتوراعاسى جانە «مايس اگرو» ج ش س مامانى رەتىندە بانكتىڭ 300 ملن تەڭگەدەن استام سوماعا اقشا قاراجاتىن جىمقىرعان.