مۇنداي شارا ناننىڭ باعاسىن بۇرىنعى دەڭگەيدە ساقتاپ قالۋعا مۇمكىندىك بەرەدى.
ازىق-تۇلىك قاۋىپسىزدىگىن قامتاماسىز ەتۋ جانە الەۋمەتتىك نان باعاسىنىڭ كوتەرىلۋىنە جول بەرمەۋ ماقساتىندا الماتى قالاسىنىڭ اكىمدىگى اۋىل شارۋاشىلىعى مينيسترلىگى، «ازىق-تۇلىك كەلىسىمشارت كورپوراسياسى» ۇك» اكسيونەرلىك قوعامىمەن 1 سۇرىپتى بيداي ۇنىنان پىسىرىلەتىن قالىپتى ناننىڭ (الەۋمەتتىك) باعاسىن تۇراقتاندىرۋ جونىندەگى مەموراندۋمعا قول قويدى، دەپ حابارلايدى Almaty-akshamy.kz.
قالالىق اكىمدىكتىڭ مالىمەتىنە سايكەس، كەلىسىم ق ر «اگروونەركاسىپ كەشەنىن جانە اۋىلدىق اۋماقتاردى دامىتۋدى مەملەكەتتىك رەتتەۋ تۋرالى» زاڭعا سايكەس قولدانىلادى. مەموراندۋم اياسىندا ازىق-تۇلىك كورپوراسياسى 1 سۇرىپتى ۇن شىعارۋ ءۇشىن الماتىنىڭ ۇن تارتاتىن ديىرمەنى بار ۇيىمدارىنا ازىق- تۇلىك بيدايىنىڭ ءبىر تونناسى ءۇشىن 90 مىڭ تەڭگە بولىپ بەكىتىلگەن باعا بويىنشا جەتكىزۋدى قامتاماسىز ەتەدى.
«ازىق-تۇلىك كورپوراسياسىنىڭ بارلىق قورىنان 2022 جىلدىڭ ناۋرىز ايىنان باستاپ، تامىز ايىن قوسا العانداعى كەزەڭدە الماتىعا شامامەن 2،7 ملرد تەڭگە جالپى سوماسىنا 29،8 مىڭ توننادان استام استىق جەتكىزۋ جوسپارلانىپ وتىر. كەلىسىم ءارى قاراي ۇزارتۋ مۇمكىندىگىمەن 2022 جىلعى تامىز ايىنا (قوسا العاندا) دەيىنگى مەرزىمدە قولدانىلادى. مەگاپوليستىڭ استىققا دەگەن ايلىق تۇتىنۋ قاجەتتىلىگى 4 261،1 توننانى قۇرايدى. شيكىزاتپەن قامتاماسىز ەتۋ قالانىڭ نەگىزگى نان-توقاش كومبيناتتارىنا الەۋمەتتىك ناننىڭ باعاسىن بۇرىنعى دەڭگەيدە ساقتاپ قالۋعا مۇمكىندىك بەرەدى»، - دەلىنەدى اكىمدىك حابارلاماسىندا.