قازاقستانداعى العاشقى ەكو-حابتىڭ الماتىدا ءساتتى جۇزەگە اسىرىلعان تاجىريبەسى وڭىرلەردە دە تارالا باستادى. سەمەي قالاسىندا العاشقى وڭىرلىك ەكولوگيالىق اعارتۋ، قالدىقتاردى سۇرىپتاۋ جانە اپسايكلينگ ورتالىعى اشىلادى. بۇل جوبا الماتىداعى ەكو-حاب ۇلگىسىندە جۇزەگە اسىرىلادى، دەپ حابارلايدى aqshamnews.kz
جوبا EA Charity باستاماسىمەن جانە ەكوبەلسەندى ەۆگەنيي مۋحامەدجانوۆتىڭ قولداۋىمەن ىسكە اسادى. ول ECO Network ەكولوگيالىق پلاتفورماسىنىڭ نەگىزىن قالاۋشى جانە جوبانى سەمەي قالاسى مەن اباي وبلىسى اكىمدىكتەرى قولداپ وتىر. اباي وبلىسىنداعى جاڭا حاب ەكولوگيالىق اعارتۋ، قالدىقتاردى سۇرىپتاۋ، شەبەرلىك ساباقتارىن وتكىزۋ جانە جەرگىلىكتى قوعامداستىقتى تۇراقتى ەكولوگيالىق تاجىريبەلەرگە تارتۋ الاڭىنا اينالماق.
«الماتىدا العاشقى ەكو-حابتىڭ قۇرىلۋى قالالىق ەكولوگيالىق ينفراقۇرىلىمدى دامىتۋدىڭ ماڭىزدى قادامى بولدى. ءبىزدىڭ تاجىريبەمىز وڭىرلەردى شابىتتاندىرىپ، وسىنداي باستامالاردىڭ بۇكىل ەل بويىنشا جۇزەگە اسىرىلىپ جاتقانىنا قۋانىشتىمىز. بۇل تۇراقتى دامۋ مەن ەكولوگيالىق ءبىلىم بەرۋ مەگاپوليستەرمەن قاتار، قازاقستاننىڭ بارلىق مادەني وڭىرلەرى ءۇشىن دە باسىمدىققا اينالىپ جاتقانىن كورسەتەدى. 2024 جىلعى 31 مامىردا ءبىزدىڭ كومپانيانىڭ جوبالارى، سونىڭ ىشىندە ەكو-حاب، مەملەكەت باسشىسىنا تانىستىرىلىپ، جوعارى باعا الدى»، – دەدى الماتى ەكو-حابىنىڭ نەگىزىن قالاۋشى ەۆگەنيي مۋحامەدجانوۆ.
الماتىداعى ەكو-حاب 2024 جىلدىڭ 5 ماۋسىمىندا الماتى قالاسىنىڭ ەكولوگيا جانە قورشاعان ورتا باسقارماسىنىڭ قولداۋىمەن اشىلعان بولاتىن. ءبىر جىلعا جەتپەيتىن ۋاقىتتا ورتالىققا 10 000-نان استام تۇرعىن كەلىپ، كۇنىنە 20-دان 100-گە دەيىن ادام سۇرىپتالعان قالدىقتارىن اكەلىپ، ەكولوگيالىق ءبىلىم بەرۋ شارالارىنا قاتىسۋدا. ورتالىق مەكتەپتەر مەن بالاباقشالار ءۇشىن شامامەن 50 شەبەرلىك ساباعىن وتكىزدى. ساباقتاردان كەيىن بالالار ۇيلەرىندە قالدىقتاردى بولەك جيناۋدى ەنگىزىپ، اتا-انالارىن دا وسى باستاماعا تارتۋدا.
سەمەيدەگى ەكو-حاب جىلىنا 15-25 مىڭ ادامدى قابىلداۋعا باعىتتالعان جانە 80-گە جۋىق ءىس-شارا وتكىزۋدى جوسپارلاپ وتىر. ولاردىڭ قاتارىندا مەكتەپ وقۋشىلارىنا ارنالعان ءبىلىم بەرۋ ەكسكۋرسيالارى مەن ايماقتاعى بيزنەستى جانە مەملەكەتتىك ورگانداردى ەكولوگيالىق باستامالارعا تارتۋ شارالارى بار. جوباعا EA Group حولدينگىنىڭ كورپوراتيۆتىك قايىرىمدىلىق قورى – EA Charity قارجىلاي قولداۋ كورسەتىپ وتىر.