قازاقستان تەاترى تاريحىندا العاش رەت الماتىنىڭ ءتورت تەاتر ۇجىمى الەمدەگى ەڭ ءىرى تاۋەلسىز تەاتر فەستيۆالدەرىنىڭ ءبىرى – فرانسيادا وتەتىن Avignon Off فەستيۆالىنە قاتىسادى. فەستيۆال 2025 جىلدىڭ شىلدە ايىندا وتەدى، دەپ حابارلايدى aqshamnews.kz
دەلەگاسيا قۇرامىنا قازاقستاننىڭ جەتەكشى تاۋەلسىز ەكى تەاترى – ARTiSHOK جانە JOLDA، سونداي-اق مەملەكەتتىك قۋىرشاق تەاترى مەن الاتاۋ مەملەكەتتىك تەاترى كىرەدى. بۇل ۇجىمداردىڭ فەستيۆالگە قاتىسۋى قازاقستاندىق تەاتر ساحناسىنىڭ حالىقارالىق مويىندالۋىنا جانە ەلدەر اراسىنداعى مادەني ديالوگتىڭ نىعايۋىنا ماڭىزدى قادام بولماق.
جوبا الماتى قالاسى اكىمدىگىنىڭ قولداۋىمەن جۇزەگە اسىرىلۋدا، ال ونىڭ ۇيىمداستىرۋ جانە ۇيلەستىرۋ جۇمىستارىن Almaty Creative كرەاتيۆتى يندۋستريالاردى دامىتۋ ورتالىعى اتقارادى.
«بۇل الماتى ءۇشىن ستراتەگيالىق قادام: ءبىز ارتىستەرىمىزگە جاڭا مۇمكىندىكتەر اشىپ، قازىرگى زامانعى قازاقستاندىق ونەردى حالىقارالىق ارەنادا كورسەتىپ، مادەني ديپلوماتيانىڭ بەرىك نەگىزىن قالايمىز»، – دەدى Almaty Creative ورتالىعىنىڭ باس ديرەكتورى مىندەتىن اتقارۋشى باقىت ەليۋبايەۆا.
Avignon Off فەستيۆالى – اۆينونداعى رەسمي فەستيۆالگە پاراللەل وتكىزىلەتىن باعدارلاما، جىل سايىن الەمنىڭ تۇكپىر-تۇكپىرىنەن جۇزدەگەن تاۋەلسىز ترۋپپانى جينايدى. Avignon Off فەستيۆالىنە قاتىسۋ ارتىستەرگە وزدەرىن تانىتۋعا، حالىقارالىق بايلانىستار ورناتۋعا جانە دامۋ جولدارىن اشۋعا مۇمكىندىك بەرەدى.
الماتى باعدارلاماسى فەستيۆال اياسىندا ءتۇپنۇسقا اۆتورلىق قويىلىمداردى، سونداي-اق كلاسسيكالىق سيۋجەتتەردىڭ زاماناۋي ينتەرپرەتاسيالارىن قامتيدى، بۇل قازاقستاندىق تەاترلاردىڭ كوركەمدىك ءتىلىنىڭ بايلىعىن كورسەتەدى.