امانقاراعاي اۋىلىندا گۋمانيتارلىق كومەك قابىلدايتىن 2 ورىن اشىلعان
قوستاناي وبلىسىنا الماتىدان اتتانعان گۋمانيتارلىق كومەك بۇگىن دىتتەگەن جەرىنە جەتتى، دەپ حابارلايدى Almaty-akshamy.kz Almaty.tv-گە سىلتەمە جاساپ.
التى جۇك كولىگىندە ازىق-تۇلىك، تۇرمىستىق تەحنيكالار، قۇرىلىس ماتەريالدارى، گيگيەنالىق زاتتار مەن مەكتەپكە قاجەتتى قۇرالدار بار. سونداي-اق ونعا جۋىق ەرىكتى دە ارنايى بارعان. ولار سالماعى 120 توننا بولاتىن الماتىنىڭ اماناتىن كومەككە مۇقتاج جاندارعا تاراتادى.
«قازىرگى تاڭدا ەرىكتىلەردىڭ كۇشىمەن بۇگىن، ەرتەڭ، بارلىق جۇرتشىلىققا جەتكىزىپ، تابىستاپ ۇلگەرەمىز دەپ ويلايمىز. ويتكەنى بىزدەن بولەك، مۇندا جەرگىلىكتى ەرىكتىلەر دە بار ەكەن. سوندىقتان دا كوپ بولىپ بىرىگىپ، گۋمانيتارلىق كومەكتى ءتيىستى جەرلەرىنە جەتكىزەمىز»، – دەدى الماتى قالاسى «جاستار رۋحى» جاستار قاناتىنىڭ ءتوراعاسى اكەجان كەڭەسوۆ.
جۇك كولىگىنە تيەلگەن زاتتاردى الماتى جۇرتشىلىعى قوستاناي وبلىسىندا ورتتەن زارداپ شەككەن اعايىنعا ارنايى جونەلتتى. قالالىق «امانات» پارتياسىنىڭ باستاۋىمەن 120 توننا ناعىز قاجەتتى زاتتاردى مەگاپوليس تۇرعىندارىنان باستاپ، قالانىڭ كاسىپكەرلەرى جيناپ بەردى. ايتا كەتەيىن، قوستاناي وبلىسىنداعى جۇرتقا جىلۋ رەتىندە ءار وڭىردەن وسىنداي كومەكتەر كەلىپ جاتىر. ازىرگە امانقاراعاي اۋىلىندا گۋمانيتارلىق كومەك قابىلدايتىن 2 ورىن اشىلعان. ال اۋليەكول اۋىلىندا وسىنداي 3 ارنايى ورىن جۇمىس ىستەپ تۇر.