كورمەگە سۋرەتشىنىڭ 70-كە جۋىق ەڭبەگى قويىلعان
الماتىدا تانىمال سۋرەتشى كامىل مۋللاشيەۆتىڭ جەكە كورمەسى اشىلدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
بەينەلەۋ ونەرىنىڭ ءتۇرلى باعىتىن قامتىعان ونەر تۋىندىلارى «ۋاقىت ءۇنى» دەپ اتالدى. سۋرەتشىنىڭ ايتۋىنشا، بۇلاي اتالۋى دا بەكەر ەمەس. سەبەبى كوپشىلىك نازارىنا ۇسىنىلعان كارتينالار سوڭعى جىلدارى ەلىمىزدە، جالپى الەمدە بولعان جاعدايلاردان سىر شەرتەدى. ماسەلەن «Covid-19»، «ءومىر ءۇشىن كۇرەس» دەپ اتالاتىن تۋىندىلارى كوپتىڭ نازارىن ەرىكسىز اۋدارتادى. كورمەگە سۋرەتشىنىڭ 70-كە جۋىق ەڭبەگى قويىلعان. اۆتور بۇلاردىڭ بارلىعىن سوڭعى 3 جىلدىقتا قاعاز بەتىنە ءتۇسىرىپتى.
«ءداۋىرىمىزدى، جاقىن ادامداردىڭ پورترەتىن، ءوزىمنىڭ فيلوسوفيالىق ويىمدى بەينەلەيتىن سۋرەتتەرىم ارقىلى ىشكى ويىمدى بىلدىرگىم كەلدى»، – دەدى ق ر ەڭبەك سىڭىرگەن قايراتكەرى، سۋرەتشى كامىل مۋللاشيەۆ.
كامىل مۋللاشيەۆ شىعارمالارلارىنىڭ نەگىزگى يدەياسى – ادام ءومىرىنىڭ قۇندىلىعى مەن رۋحانياتى. شەبەردىڭ مىڭنان استام كارتيناسى بار. ءابىلحان قاستەيەۆ اتىنداعى مەملەكەتتىك ونەر مۋزەيىندەگى كورمە 7 قازانعا دەيىن جالعاسادى. كەلىپ تاماشالايمىن دەگەن قالا تۇرعىندارى مەن قوناقتارى ءۇشىن مۇراجاي كۇن سايىن تاڭعى ساعات 10:00-دان كەشكى 18:00-گە دەيىن ءۇزىلىسسىز جۇمىس ىستەيدى.
«ادامنىڭ مىنەزىنىڭ وزگەرۋى، نەمقۇرايلىلىعىن كۇلكىلى يرونيالىق تىلدە جەتكىزگەن شىعارمالارى دا بار. سونداي-اق پورترەتتىك تۋىندىلارى دا كوپ. ولار – قازاقستاننىڭ ەڭبەك سىڭىرگەن قايراتكەرلەرى مەن بەلگىلى تۇلعالار بار»، – دەدى ءا. قاستەيەۆ اتىنداعى مەملەكەتتىك ونەر مۋزەيىنىڭ ءبولىم جەتەكشىسى ساندۋعاش مىرزابەكوۆا.