الماتىدا سينتەتيكالىق ەسىرتكىنى وندىرۋگە ارنالعان شيكىزاتتىڭ ءىرى كولەمى تاركىلەندى
سينتەتيكالىق ەسىرتكىلەر شىعاراتىن سەح قالقامان ىقشاماۋدانىنداعى جەكە ءۇيدىڭ جەرتولەسىندە جۇمىس ىستەگەن. بەلگىلى بولعانداي، ءۇي وتكەن جىلدىڭ قازان ايىندا جاس جىگىتكە اي سايىن 300 مىڭ تەڭگەگە جالعا بەرىلگەن.
«رۇقسات ەتىلگەن ءتىنتۋ كەزىندە ۇنتاق جانە كەسەك تۇرىندەگى زاتتار، حيميالىق زاتتار سالىنعان پلاستيك ىدىستار، سۇيىقتىقتارى بار كولبالار، ەلەكتروندى تارازىلار جانە مەفەدرون سينتەتيكالىق پسيحوتروپتىق زاتىن ءوندىرۋ كەزىندە قىلمىسكەرلەر پايدالانعان باسقا دا زاتتار تاركىلەندى. ەسىرتكى شىعارۋعا جاۋاپتى – 23 جاستاعى و.ەسىمدى ازامات. اياقتالماعان مەديسينالىق ءبىلىمى بار جاس جىگىت، ەسىرتكى ءوندىرىسىن جولعا قويعان. جالپى، ەسىرتكى زەرتحاناسىنان بىرنەشە كەلى كەپتىرىلگەن زاتتار تاركىلەندى. ولاردىڭ ءتۇسى ءارتۇرلى: اق، قارا، جاسىل، قوڭىر. ءبىر قاپتاما قوڭىر ءتۇستى “ءشوپتىڭ” سالماعى شامامەن 160 گرامم، اعىنان – 500. بۇل دايىن ءونىم جانە ونى دوزاعا ءبولىپ، وراۋ كەرەك بولدى. جەرتولەدەن تابىلعاننىڭ ءبارى: سۇيىق، كريستالدى جانە ۇنتاق كۇيىندە سوت-حيميالىق ساراپتاماعا جىبەرىلدى. سوتقا دەيىنگى تەرگەۋ باستالدى»، – دەدى الماتى قالالىق پوليسيا دەپارتامەنتى باستىعىنىڭ ورىنباسارى بەرىك ابىلبەكوۆ.
پوليسيا قىزمەتكەرلەرى جەدەل تۇردە ەسىرتكى بيزنەسىنە تاعى بەس ادامنىڭ قاتىستىلىعىن انىقتادى، ولاردىڭ ەكەۋى 23 جانە 19 جاستاعى قىزدار. ولار – تۇركىستان جانە الماتى وبلىستارىنان كەلگەندەر. ولاردىڭ مىندەتتەرىنە دايىن ەسىرتكىلەرگە بەتبەلگى قويۋ كىردى. كۇدىكتىلەر قاماۋعا الىندى.
«قىلمىستى ۇيىمداستىرۋشىنىڭ ايتۋىنشا، ول Telegram-داعى كۋراتوردىڭ نۇسقاۋى بويىنشا ارەكەت ەتكەن. زەرتحاناعا ارنالعان قۇرامداس بولىكتەردى الماتى وبلىسى تالعار اۋدانى اۋماعىنداعى “بەتبەلگىلەر” ارقىلى العان. ءبىر اپتا ىشىندە ول 2-3 كەلىگە جۋىق سينتەتيكالىق ەسىرتكى جاساعان، جۇمىسى ءۇشىن بيتكوينمەن اپتا سايىن 280 مىڭ تەڭگە كولەمىندە قاراجات الىپ وتىرعان. ساراپتاما قورىتىندىسى بويىنشا، تاركىلەنگەن زاتتار - جالپى سالماعى 4 كەلىدەن اساتىن “ا-PVP” سينتەتيكالىق ەسىرتكى زاتى، 312 گرامم مەفەدرون جانە 15 ليتر تۋلۋول (پرەكۋرسور). شيكىزات باعاسى 150 ملن تەڭگەنى قۇرايدى»، – دەدى ابىلبەكوۆ.