الماتىداعى تۇنگى كلۋبتاردىڭ بىرىندە ەسىرتكى ساتۋشى ۇستالدى

ارنايى ءىس-شارا قالا پروكۋراتۋراسىنىڭ ۇيلەستىرۋىمەن “ەسىرتكى بيزنەسىنە قارسى كۇرەس” جوباسى اياسىندا جۇرگىزىلدى.

جەدەل ۋاكىلدەر مەن پوليسيانىڭ ارنايى جاساقتارى الماتىنىڭ مەدەۋ اۋدانىنداعى ويىن-ساۋىق مەكەمەسىندە سينتەتيكالىق ەسىرتكى ساتۋمەن اينالىسقان كۇدىكتىنى ۇستادى، دەپ حابارلايدى Almaty-akshamy.kz Polisia.kz-كە سىلتەمە جاساپ.

«كۇدىكتىنى جەكە ءتىنتۋ كەزىندە ودان قارا يزولەنتاعا ورالعان بۋما تابىلدى جانە تاركىلەندى. الدىن الا مالىمەتتەر بويىنشا، ونىڭ ىشىندە ەرەكشە ءيىسى بار اق ءتۇستى ۇنتاق تۇرىندەگى سينتەتيكالىق ەسىرتكى بولدى. 28 جاستاعى ب.ەسىمدى ازاماتتىڭ ايتۋىنشا، ول بۇل “چەكتى” تانىس قىزىنىڭ ءوتىنىشى بويىنشا ساتىپ العان. ءبىزدىڭ جەدەل دەرەكتەرگە سايكەس، ول – وسىعان ۇقساس قىلمىستى بىرنەشە رەت جاساعان ەسىرتكى ساتۋشىسى. قازىرگى ۋاقىتتا ءبىرقاتار ارنايى ساراپتامالار تاعايىندالدى. بۇل دەرەك ق ر قك-نىڭ 297-بابى بويىنشا سوتقا دەيىنگى تەرگەۋدىڭ ءبىرىڭعاي تىزىلىمىنە تىركەلدى»، – دەدى الماتى قالالىق پد ەسىرتكى قىلمىسىنا قارسى كۇرەس باسقارماسىنىڭ باستىعى ەرلان الماعامبەتوۆ.

كۇدىكتىنىڭ بۇرىن جاقىن ماڭداعى تۇنگى كلۋبتا ديدجەي بولىپ جۇمىس ىستەگەنى بەلگىلى بولدى. وعان قوسا، ول ادامدى توناعانى ءۇشىن جازاسىن وتەگەن. قىلمىستىق ءىستىڭ باسقا دا ءمان-جايلارى ق ر قپك-نىڭ 201-بابى جانە ق ر كونستيتۋسياسىنىڭ نورمالارىنا سايكەس جاريا ەتۋگە جاتپايدى.