قالاداعى پروكۋرورلار كاسىپكەرلەردىڭ قۇقىقتارىنىڭ ساقتالۋىنا تالداۋ جۇرگىزدى.
پروكۋروردىڭ تالاپ ارىزى بويىنشا ءتورت كاسىپكەر بورىشكەرلەر تىزىمىنەن شىعارىلىپ، شاعىن جانە ورتا بيزنەسكە بەرىلگەن قۇقىقتارىن ەركىن جۇزەگە اسىرۋعا مۇمكىندىك الدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
الماتى قالاسىنىڭ پروكۋراتۋراسى وڭالتۋ ساتىسىندا تۇرعان كاسىپكەرلەردىڭ قۇقىقتارىنىڭ ساقتالۋىنا تالداۋ جۇرگىزدى.
ناتيجەسىندە الماتى قالاسىنىڭ سوت ورىنداۋشىلارى وڭالتۋ جوسپارىن بەكىتكەن ءتورت كاسىپكەرگە قاتىستى اتقارۋشىلىق ءوندىرىستى توقتاتۋ شارالارى قابىلدانباعانى جانە ولار بورىشكەرلەر تىزىمىنەن شىعارىلماعانى انىقتالدى.
«بۇل كاسىپكەرلەردىڭ ءوز قىزمەتىن تولىق جۇزەگە اسىرۋىنا، مەملەكەتتىك ساتىپ الۋلارعا قاتىسۋىنا كەرى اسەرىن تيگىزەدى. الماتى قالاسى بوستاندىق اۋدانى پروكۋراتۋراسىنىڭ ۇسىنۋىمەن الماتى قالاسىنىڭ ادىلەت دەپارتامەنتى تاراپىنان اتقارۋشىلىق ءىس جۇرگىزۋدى توقتاتۋ شارالارى قابىلدانىپ، كاسىپكەرلەر بورىشكەرلەر تىزىلىمىنەن شىعارىلدى. بۇل شارالار كاسىپكەرلىك سۋبەكتىلەرىنىڭ بەرىلگەن قۇقىقتارىن ەركىن جۇزەگە اسىرۋعا مۇمكىندىك بەرەدى»، - دەپ حابارلادى ۆەدومستۆودان.
سونىمەن قاتار، پروكۋراتۋرا «وڭالتۋ جانە بانكروتتىق تۋرالى» قازاقستان رەسپۋبليكاسى زاڭىنىڭ 68-بابى 1-تارماعىنىڭ 3) تارماقشاسىنا سايكەس وڭالتۋ جوسپارىن بەكىتۋ تۋرالى سوت ۇيعارىمى زاڭدى كۇشىنە ەنگەننەن كەيىن بارلىق شەكتەۋلەر جانە بورىشكەردىڭ مۇلكىنە سالىنعان اۋىرتپالىقتار (بورىشكەردىڭ شوتتارىنا ءوندىرىپ الۋ، مۇلىككە تىيىم سالۋ جانە ت.ب.) ولاردى سالعان ورگانداردىڭ ءتيىستى شەشىمدەرىنسىز جويىلاتىنىن ەسكە سالدى.