مەكتەپكە دەيىنگى جانە ورتا ءبىلىم بەرۋ كوميتەتى مينيستر اسحات ايماعامبەتوۆتىڭ «ورتا ءبىلىم بەرۋ ۇيىمدارىندا 2022–2023 وقۋ جىلىنىڭ باستالۋىن، ۇزاقتىعىن جانە كانيكۋل كەزەڭدەرىن ايقىنداۋ تۋرالى» بۇيرىعىنىڭ جوباسىن ازىرلەدى.
اتى ايتىپ تۇرعانداي، قۇجات جاڭا وقۋ جىلىنداعى بالالاردىڭ دەمالىس مەرزىمدەرىن وزگەرتەدى، دەپ حابارلايدى Almaty-akshamy.kz ءىnbusiness.kz سىلتەمە جاساپ.
ونى جەكەمەنشىك مەكتەپتەر دە ساقتاۋعا مىندەتتى بولادى. بىردەن ايتا كەتەلىك، بۇرىنعىعا قاراعاندا، كانيكۋلدار ءبىرشاما قىسقارادى، سول ارقىلى وقۋ اپتالارى ۇزارماق.
سونىمەن، مەنشىك نىسانىنا جانە ۆەدومستۆولىق باعىنىستىلىعىنا قاراماستان، ورتا ءبىلىم بەرۋ ۇيىمدارىندا وقۋ جىلىنىڭ باستالۋى، ۇزاقتىعى جانە كانيكۋلى كەزەڭدەرىنىڭ كەلەسى مەرزىمدەرى ايقىندالادى:
- 2022–2023 وقۋ جىلى ءداستۇرلى تۇردە 2022 جىلعى 1 قىركۇيەكتە باستالادى. بيىلعى جىلى «ءبىلىم كۇنى»، 1 قىركۇيەك اپتا ىشىندە بەيسەنبىگە تۇسپا-تۇس كەلەدى.
- جاڭا وقۋ جىلىنىڭ ۇزاقتىعى 1-سىنىپتاردا 35 وقۋ اپتاسىن قۇرايدى. ال 2–11 جانە 12ء-شى سىنىپتاردا 36 وقۋ اپتاسىنا سوزىلادى. سالىستىرساق، 2021–2022 وقۋ جىلىندا وقۋ جىلىنىڭ ۇزاقتىعى 1-سىنىپتاردا 33 وقۋ اپتاسىن، ال 2–12-سىنىپتاردا 34 وقۋ اپتاسىن قۇراعان بولاتىن.
- وقۋ جىلى ىشىندەگى كانيكۋل كەزەڭدەرى بىلايشا بەلگىلەنىپ وتىر: 1–11 (12)، ياعني بارلىق سىنىپتاردا كۇزگى كانيكۋل 7 كۇندى قۇرايدى. ياعني، 2022 جىلعى 31 قازاننان 6 قاراشا ارالىعىندا. قىسقى كانيكۋل – 9 كۇن: 2022 جىلعى 31 جەلتوقسان مەن 2023 جىلعى 8 قاڭتار ارالىعىندا. كوكتەمگى كانيكۋل 9 كۇندى - 2023 جىلعى 18–26 ناۋرىز ارالىعىن قامتيدى. سالىستىرا كەتسەك، بيىلعى كوكتەمدە اياقتالعان الدىڭعى وقۋ جىلىندا 1–12-سىنىپتاردا كۇزگى كانيكۋل 7 كۇنگە (2021 جىلعى 1-7 قاراشا ارالىعىنا)، قىسقى كانيكۋل 18 كۇنگە (2021 جىلعى 30 جەلتوقسان مەن 2022 جىلعى 16 قاڭتار ارالىعىنا)، كوكتەمگى كانيكۋل 12 كۇنگە (2022 جىلعى 19-30 ناۋرىز ارالىعىنا) سوزىلعان.
- 1-سىنىپتاردا 7 كۇندىك قوسىمشا كانيكۋل بەلگىلەنەدى: ول 2023 جىلعى 6–12 اقپان ارالىعىندا بەرىلەدى. الدىڭعى وقۋ جىلىندا بۇل بونۋس-كانيكۋل 7–13 اقپان ارالىعىندا ۇسىنىلعان.