الماتىنىڭ شىعىس بولىگىندە، تاتتىمبەت كوشەسى مەن دوستىق داڭعىلىنا قاتارلاسا سوزىلىپ جاتقان ايگىلى تەررەنقۇر دەمالىس ايماعى اۋقىمدى قايتا جاڭعىرتۋدان ءوتتى. بۇل قالا تۇرعىندارىنىڭ سۇيىكتى سەرۋەن ورنىنا اينالعان ەرەكشە مەكەن.
4 گەكتاردان اساتىن اۋماقتا زاماناۋي تالاپقا ساي جايلى كەڭىستىك جاسالىپ، ءار جاستاعى كەلۋشىلەرگە ارنالعان دەمالىس ايماقتارى بوي كوتەردى. جاڭا جاياۋ جۇرگىنشىلەر جولدارى توسەلىپ، «دەنساۋلىق سوقپاعى» كەڭەيتىلىپ، جاڭارتىلدى. ساياباقتىڭ ءار بولىگىن جالعاپ تۇرعان اعاش كوپىردەن ەسەنتاي وزەنىنىڭ اسەم كورىنىسى كوز تارتادى.
ۇزاق جىل قاڭىراپ جاتقان سۋ ايدىنى تازارتىلىپ، بەكىتىلىپ، جاعالاۋى كوركەيتىلدى. وزەن جاعاسىندا ونەر ساحناسى، قارسى بەتىندە اشىق اسپان استىنداعى امفيتەاتر پايدا بولدى.
بەلسەندى دەمالىس ءۇشىن ءۇش تەننيس ۇستەلى، ءتورت شاحمات ۇستەلى جانە زاماناۋي سپورت جابدىقتارى ورناتىلعان ۆوركاۋت ايماقتارى جاسالدى. بالالار ءۇشىن ەكى زاماناۋي ويىن الاڭى مەن ويىن ەكولوگيالىق ويىن ايماعى قۇرىلدى.
ساياباقتىڭ باستى نىشانى – التىن كۇمبەزدى اپپاق روتوندا ەرەكشە تۇرگە ەندى. ونىڭ اينالا قورشاعان جولدار ىلمەلى گۇلزارلارمەن بەزەندىرىلدى.
ساياباق اۋماعىنا 30 جاڭا ورىندىق قويىلىپ، اۆتوماتتى سۋارۋ جۇيەسى مەن زاماناۋي جارىقتاندىرۋ ورناتىلدى.
بۇگىندە تەررەنقۇر «دەنساۋلىق سوقپاعى» عانا ەمەس، سونىمەن قاتار كەزدەسۋ مەن سەرۋەندەۋگە ارنالعان جايلى ورىن. مۇندا كۇن سايىن 3500-دەن استام قالا تۇرعىنى مەن تۋريست كەلەدى.
ايتا كەتەيىك، بۇل اۋماق جەكە مەنشىككە تيەسىلى بولعاندىقتان، مۇندا 20 جىلدان استام جوندەۋ جۇرگىزىلمەگەن. 2023 جىلى جەر تەلىمى كوممۋنالدىق مەنشىككە قايتارىلىپ، سودان كەيىن قايتا جاڭعىرتۋعا ارنالعان جوبالىق-سمەتالىق قۇجاتتامانى ازىرلەۋ جۇمىستارى باستالدى.
2024 جىلى قۇرىلىس-مونتاج جۇمىستارى باستالدى. جوبانىڭ باستى ماقساتى – ەسەنتاي وزەنى بويىنداعى جانە تەررەنقۇرداعى ەكى تانىمال جاياۋ باعىتتى بىرىكتىرىپ، قالا تۇرعىندارىنىڭ سۇيىكتى ورنىنا اينالدىرۋ.