2 قاراشادا قازاقستان پرەزيدەنتى قاسىم-جومارت توقايەۆ “راقىمشىلىق جاساۋ تۋرالى” زاڭعا قول قويدى.
قاندى قاڭتار وقيعاسى كەزىندە بەيبىت شەرۋمەن بىرگە الاڭعا شىعىپ، ارتىنان ارانداتۋشىلاردىڭ تورىنا ءتۇسىپ قالعاندار كوپ. اتالعان زاڭ بويىنشا وسىنداي قاڭتار وقيعاسىنا قاتىسۋشىلاردىڭ ءبىرازى اقتالىپ، ءارتۇرلى دەڭگەيدە قىلمىس جاساعاندارعا راقىمشىلىق جاسالماق، دەپ حابارلايدى Almaty-akshamy.kz Polisia.kz-كە سىلتەمە جاساپ.
جىل باسىندا ەلىمىزدەگى ەڭ ۇلكەن مەگوپوليس – الماتى قالاسىنداعى № 72 مەكەمەسىنە (تەرگەۋ يزولياتورى) قاڭتار وقيعاسىنا قاتىستى 563 ادام قامالعان بولاتىن. بۇگىندە ونىڭ 65ء-ى جازاسىن وتەۋ ورىندارىنا كەتسە، 416 ادام ءتۇرلى نەگىزدەر بويىنشا قاماۋدان بوساتىلدى. ءقازىر تەرگەۋ يزولياتورىندا قاڭتار وقيعاسىنا قاتىستى 82 ادام ۇستالۋدا. “راقىمشىلىق جاساۋ تۋرالى” زاڭىنا بايلانىستى وسى كۇدىكتىلەرگە قاتىستى جۇمىستار جۇرگىزىلۋدە. ولاردىڭ اراسىندا مەرزىمىنەن بۇرىن شارتتى تۇردە بوساتىلاتىندار مەن جازاسىن جەڭىلدەتۋگە جاتاتىندار بار، كەرىسىنشە 3 ادامنىڭ جاساعان قىلمىسى راقىمشىلىق جاساۋعا جاتپايدى.
“راقىمشىلىق جاساۋ تۋرالى” ق ر زاڭىن قولدانۋ ءۇشىن بارلىق ماتەريالدار الماتى قالاسىنىڭ اۋماقتىق سوتىنا جىبەرىلدى. اتالعان زاڭدا تەررورلىق، ەكسترەميستىك، سىبايلاس جەمقورلىق قىلمىستار، مەملەكەتكە وپاسىزدىق جاساۋ، ازاپتاۋ، جاپپاي تارتىپسىزدىكتەردى ۇيىمداستىرۋ، كامەلەتكە تولماعانداردىڭ جىنىستىق قول سۇعىلماۋشىلىقتارىنا قارسى قىلمىستار جاساعان ادامدارعا راقىمشىلىق جاسالمايتىنى كورسەتىلگەن.