ءتىنتۋ بارىسىندا كامەرالاردىڭ بىرىنەن ۇيالى تەلەفوندار تابىلدى
الماتى قالاسى بويىنشا قىلمىستىق-اتقارۋ جۇيەسى دەپارتامەنتىنىڭ باسشىلىعى ىشكى ىستەر مينيسترلىگىنە قاراستى كينولوگيالىق ورتالىققا ەسىرتكى زاتتارىن انىقتاۋ ءۇشىن لا-155/18 مەكەمەسىنە قىزمەتتىك يتتەردى پايدالانا وتىرىپ، ءتىنتۋ جۇرگىزۋ تۋرالى ارنايى حات جولداعان بولاتىن. جۋىردا اتالعان حات نەگىزىندە الماتىداعى تەرگەۋ يزولياتورىندا كينولوگيالىق ورتالىق قىزمەتكەرلەرى ءتىنتۋ جۇرگىزدى، دەپ حابارلايدى Almaty-akshamy.kz Polisia.kz-كە سىلتەمە جاساپ.
اتالعان جۇمىسقا ۇلتتىق ۇلاننىڭ 12 قىزمەتكەرى جانە پوليسيا دەپارتامەنتىنە بىلىكتىلىگىن ارتتىرۋعا كەلگەن پوليسيا قىزمەتكەرلەرى قاتىستى. ءتىنتۋ ەسىرتكى ىزدەۋشى ءۇش ءيتتىڭ كومەگىمەن جۇرگىزىلدى. جۇمىس بارىسىندا تەرگەۋ يزولياتورىنىڭ سەگىز پوستى مەن سالەمدەمەلەر قابىلدايتىن ورىندار تەكسەرىلدى.
ناتيجەسىندە تۇتقىندار وتىراتىن كامەرالاردىڭ بىرىنەن بۇزىلعان شاينەكتىڭ ىشىنە جاسىرىلعان inoi جانە Nokia تەلەفوندارى تابىلدى. الداعى ۋاقىتتا ءىىم كينولوگيالىق ورتالىعى ماماندارىنىڭ جانە ەسىرتكى ىزدەۋشى قىزمەتتىك يتتەردىڭ كومەگىمەن ءار توقسان سايىن ءبىر رەت ءتىنتۋ جۇمىستارىن جۇرگىزۋ جوسپارلانىپ وتىر.