ماماندار تىك قارلى بەتكەيلەرگە شىعۋعا تيىم سالادى.
الماتىدا قار كوشكىنىن پروفيلاكتيكالىق ءتۇسىرۋ جۇمىستارى جۇرگىزىلدى. بۇل تۋرالى قالالىق تدج باسپا ءسوز قىزمەتى ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«تۇرعىندار مەن تۋريستەردىڭ قاۋىپسىزدىگىن قامتاماسىز ەتۋ ماقساتىندا جانە ۇلكەن جانە كىشى الماتى وزەندەرىنىڭ باسسەيندەرىندە كوشكىندەردىڭ وزدىگىنەن تۇسۋىنە بايلانىستى 24 قاراشادا «شىمبۇلاق» تاۋ شاڭعى كۋرورتى اۋماعىندا قار ءتۇسىرۋ جۇمىستارى جۇرگىزىلدى»، - دەپ حابارلادى الماتى قالالىق تجد باسپا ءسوز قىزمەتى.
جاساندى كوشكىن كەزىندە كولەمى 1 مىڭ تەكشە مەتر قار ماسساسى تاۋ ەتەگىنە ءتۇستى. جۇرگىزىلگەن جۇمىستاردىڭ ناتيجەسىندە «شىمبۇلاق» دەمالۋشىلارىنىڭ قاۋىپسىزدىگى قامتاماسىز ەتىلدى
دەپارتامەنت تاراتقان مالىمەتكە سايكەس، الماتىنىڭ تاۋلى ايماعىندا قار كوشكىنى ءقاۋپى بار 165 ۋچاسكە بار، ونىڭ ىشىندە قالا تۇرعىندارى مەن تۋريستەرى ءۇشىن ەڭ ۇلكەن قاۋىپتىلەرى - «مەدەۋ»، «شىمبۇلاق» تشك جانە ۇلكەن الماتى كولى اۋدانىندا ورنالاسقان 18 ۋچاسكە.
«قازگيدرومەت» رمك جانە «قازسەلدەنقورعاۋ»مم بەكەتتەرى قار كوشكىنى جاعدايىنا تۇراقتى مونيتورينگ جۇرگىزەدى. شۇعىل شارالارعا «قازسەلدەنقورعاۋ» مم الماتى قالالىق پايدالانۋ-تەحنيكالىق باسقارماسىنىڭ بازاسىندا اۆاريالىق-مەحانيكالاندىرىلعان بريگادا قۇرىلىپ، تۇراقتى دايىندىققا كىرىسەدى»،- دەپ اتاپ ءوتتى ۆەدومستۆودان.
سونىمەن قاتار، تاۋلى اۋدانداردا جاۋىن-شاشىننىڭ ءتۇسۋى جانە قار جامىلعىسىنىڭ تۇراقسىز جاعدايى سالدارىنان قار كوشكىنىنىڭ وزدىگىنەن ءتۇسۋى مۇمكىن.
وسىعان بايلانىستى، الماتى قالاسى تجد قار كوشكىنىنىڭ ىقتيمال ەرۋىنە بايلانىستى تىك قارلى بەتكەيلەرگە شىعۋعا تيىم سالادى.