الماتىنىڭ ناۋرىزباي اۋدانىنداعى قاراۋسىز قالعان اۋماقتا ويىن جانە سپورت الاڭدارى بار زاماناۋي سكۆەر سالىندى. جاڭا سكۆەرگە كۇن سايىن 800 گە جۋىق بالا بارادى
الماتى اكىمى ەربولات دوسايەۆ جۇمىس ساپارى اياسىندا الماتىنىڭ ناۋرىزباي اۋدانى «قالقامان شاعىن اۋدانىنداعى كولەمى 0،8 گا بواتىن جاڭا قوعامدىق كەڭىستىكتى ارالادى، دەپ حابارلايدى aqshamnews.kz
بۇرىن بۇل ۋچاسكە قاراۋسىز قالعان بوس جەر بولعان، ال ءقازىر «حالىق قاتىساتىن بيۋدجەت» باعدارلاماسىنىڭ ارقاسىندا قالا تۇرعىندارىنىڭ بوس ۋاقىتىن وتكىزەتىن ادەمى جانە ىڭعايلى كەڭىستىككە اينالدى. كۇن سايىن الاڭعا 1000 – عا جۋىق ادام كەلەدى، ولاردىڭ 800-گە جۋىعى بالالار مەن جاسوسپىرىمدەر.
كەلۋشىلەرگە جايلىلى بولۋ ءۇشىن 2 مىڭ شارشى مەتر جاياۋ جۇرگىنشىلەر ايماعى اباتتاندىرىلدى، 17 بالالار ويىن كەشەنى مەن 13 سپورتتىق ترەناجەر ورناتىلدى، باسكەتبول-ۆولەيبول الاڭدارى، فۋتبول الاڭى، تەننيس ۇستەلدەرى بار. سونىمەن قاتار، 400-دەن استام جاسىل جەلەك وتىرعىزىلدى، اۆتوماتتاندىرىلعان سۋارۋ جۇيەسى ورناتىلدى، جاڭبىر سۋىن بۇرۋ ءۇشىن ارىق جۇيەسى جابدىقتالدى.
قوعامدىق كەڭىستىك قۇرىلىسىنىڭ ناتيجەلەرىن تەكسەرۋ بارىسىندا ەربولات دوسايەۆ جەرگىلىكتى تۇرعىندارمەن اڭگىمەلەستى، ولار وسى جوبانى جۇزەگە اسىرعانى ءۇشىن اكىمگە العىستارىن ءبىلدىردى.
«جىل سايىن ءبىزدىڭ اۋداندا جاڭا دەمالىس الاڭدارى سالىنىپ جاتقانىنا قۋانىشتىمىز. بۇرىن بۇل ۋچاسكە قاراۋسىز قالعان، مۇندا بەلگىلى ءبىر تۇرعىلىقتى جەرى جوق ادامدار تۇراتىن. ءقازىر بۇل زاماناۋي الاڭ، بارلىعى ىڭعايلى. ءبىز مۇندا بالالارمەن كەلەمىز، سەرۋەندەيمىز. جاڭا كەڭىستىكتە ءتۇرلى جاستاعى ادامدار دەمالا الادى. كىشكەنتاي بالالار ءۇشىن ءتىپتى كوڭىلدى جەر-تۇرلى ويىن كەشەندەرى وتە كوپ، ولار كۇندىز-تۇنى وسىندا وينايدى. مۇندا جاسوسپىرىمدەر مەن جاستار سپورتپەن شۇعىلدانا الادى. زەينەتكەرلەر دە وسىندا دەمالادى. وسى جەردە پاترۋلدەۋدى كۇشەيتۋدى سۇرايمىز»، - دەدى ناۋرىزباي اۋدانىنىڭ تۇرعىنى زاۋرەش مۇستافايەۆا.
ءوز كەزەگىندە ەربولات دوسايەۆ ناۋرىزباي اۋدانىندا قوعامدىق قاۋىپسىزدىكتى قامتاماسىز ەتۋ ءۇشىن بەينەمونيتورينگ جۇيەسىنىڭ (اوسشك) 600 كامەراسى ورناتىلاتىنىن اتاپ ءوتتى. ولاردىڭ ۇشەۋى جاڭا الاڭعا ورنالاستىرىلعان. كامەرالاردان بەينەماتەريالدار بىردەن قالا پوليسياسىنا كەلىپ تۇسەدى.
«مەنىڭ تاپسىرمام بويىنشا مۇندا تاعى 4 كامەرا ورناتىلادى. وسىلايشا، ءبىز تۇرعىنداردىڭ تولىق قاۋىپسىزدىگىن قامتاماسىز ەتەمىز. ءبىز جاڭا فورماتتاعى سكۆەر سالدىق. مۇندا ءارتۇرلى ويىن جانە سپورت الاڭدارى، كىشى ساۋلەت پىشىندەرى، سونىڭ ىشىندە اعاشتان جاسالعاندار بار. بىرتە-بىرتە ءبىز جەرگىلىكتى تۇرعىنداردىڭ جايلى ءومىر ءسۇرۋى ءۇشىن جاڭا قوعامدىق كەڭىستىكتەر قۇرىپ، جاقسارتاتىن بولامىز. مىسالى، ءبىز قارعالى وزەنىنىڭ جاعاسىندا سەرۋەندەۋ ايماعىن قۇرۋدى جوسپارلاپ وتىرمىز»، - دەدى قالا باسشىسى.
ايتا كەتەرلىگى، «حالىق قاتىساتىن بيۋدجەت» (حقب) اياسىندا ناۋرىزباي اۋدانىندا بيىل بارلىعى 2،5 ملرد تەڭگەگە 40 جوبا ىسكە اسىرىلاتىن بولادى.
جالپى الماتىدا اعىمداعى جىلى «حقب» جوباسىنا 18،8 ملرد تەڭگە ءبولىندى، بۇل وتكەن جىلمەن سالىستىرعاندا 5،8 ملرد تەڭگەگە كوپ. قالا تۇرعىندارى اۋلالاردى، قوعامدىق كەڭىستىكتەردى اباتتاندىرۋ، سپورت جانە ويىن الاڭدارىن قۇرۋ بويىنشا 364 جوبانى ۇسىنۋعا جانە ىسكە اسىرۋعا مۇمكىندىك الادى.