سەيسمولوگتار مەن عالىمدار بۇل ينستيتۋت عىلىم مينيسترلىگى باسقارۋىندا بولۋ ءتيىس دەپ سانايدى.
عىلىم جانە جوعارى ءبىلىم ءمينيسترى ساياسات نۇربەك الماتىنىڭ ۇلتتىق سەيسمولوگيالىق باقىلاۋ عىلىمي ورتالىعى نەگە تجم-نىڭ قاراۋىنا بەرىلگەنىن ءتۇسىندىردى، دەپ حابارلايدى Almaty-akshamy.kz
دەپۋتات باقىتجان بازاربەك ءماجىلىس وتىرىسىندا عىلىم جانە جوعارى ءبىلىم مينيسترىنەن الماتىنىڭ ۇلتتىق سەيسمولوگيالىق باقىلاۋ عىلىمي ورتالىعى نەگە تجم-عا قاراۋىندا ەكەنىن سۇرادى. ويتكەنى سەيسمولوگتار مەن عالىمدار بۇل ينستيتۋت عىلىم مينيسترلىگى باسقارۋىندا بولۋ ءتيىس دەپ سانايدى ەكەن.
ساياسات نۇربەك كەزىندە ءبىرقاتار ينستيتۋتتاردىڭ سالالىق مينيسترلىكتەرگە تابىستالعانىن باسا اتاپ ءوتتى. وسىعان بايلانىستى سەيسمولوگيا ينستيتۋتى دا ءقازىر تجم قاراماعىندا بولىپ تابىلادى.
"وكىنىشكە قاراي، ول ارادا تولىقتاي قارجىلاندىرۋ دەگەن جوق، ويتكەنى قارجىلاندىرۋ سالالىق پرينسيپ بويىنشا جۇرگىزىلەدى. سونداي-اق ءبىزدىڭ قولىمىزدا بۇل ينستيۋتقا قانداي دا ءبىر جولمەن كومەكتەسۋگە، ولاردىڭ قىزمەتىنە ارالاسۋعا مۇمكىندىك بەرەتىن قۇرالدار جوق. ەگەر ونى بىزگە قايتارسا، ءبىز وعان قۋانامىز"، دەدى عىلىم جانە جوعارى ءبىلىم ءمينيسترى ساياسات نۇربەك.
ونىڭ ايتۋىنشا، بيىل ينستيتۋتقا شامامەن 3،5 ملرد تەڭگە گرانت ءبولۋ جوسپارلانىپ وتىر.