ىشكى ىستەر مينيسترلىگى الەۋمەتتىك وسال توپتاردى، سونىڭ ىشىندە كامەلەتكە تولماعانداردى دا قامتىعان قىلمىستىق سحەمالاردى انىقتادى.
"STOP-ترافيك" جەدەل-پروفيلاكتيكالىق ءىس-شاراسى اياسىندا ادام ساۋداسىمەن بايلانىستى ءبىرقاتار اۋىر قىلمىستىڭ جولى كەسىلدى: بارلىعى 39 فاكت تىركەلدى، ونىڭ التاۋى كامەلەتكە تولماعاندارعا قاتىستى. الماتى قالاسىندا جاڭا تۋعان نارەستەلەردى ساتۋ فاكتىلەرىنە قاتىسى بار قىلمىستىق توپ اشكەرەلەندى، - دەپ حابارلايدى Aqshamnews.kz.
ۇيىمداستىرۋشىلار قيىن ومىرلىك جاعدايعا تاپ بولعان جاس ايەلدەردى ماتەريالدىق سىياقى ءۇشىن ءسابيىن بوگدە ادامدارعا بەرۋگە يتەرمەلەگەن. بارلىق قاتىسۋشى ۇستالدى. 20-دان استام قىلمىستىق ءىس تەرگەلۋدە. كۇدىكتىلەرگە مۇلكىن تاركىلەي وتىرىپ، 18 جىلعا دەيىن باس بوستاندىعىنان ايىرۋ جازاسى كوزدەلگەن.
اباي وبلىسىندا ازاماتتاردى ءماجبۇرلى ەڭبەككە تارتىپ، قاناۋ فاكتىسى انىقتالدى. 11 قىلمىستىق ءىس قوزعالىپ، ماتەريالدار سوتقا جىبەرىلۋدە. تۇنگى ويىن-ساۋىق ورىندارىن جۇيەلى تەكسەرۋ بارىسىندا شىمكەنتتە، اقتوبە، جامبىل، باتىس قازاقستان، قاراعاندى جانە قوستاناي وبلىستارىندا ازاماتتاردى، ونىڭ ىشىندە كامەلەتكە تولماعانداردى قاناۋدىڭ ءارتۇرلى فاكتىلەرىنىڭ جولى كەسىلدى.
استانادا پوليسيا مەن پروكۋراتۋرا بىرلەسىپ، تەمىرجول ۆوكزالى ماڭىندا رەيدتەر جۇرگىزدى. ازاماتتاردى سەكسۋالدىق ماقساتتا پايدالانۋعا ارنالعان پريتونداردى ۇيىمداستىرۋ جانە ۇستاۋ بويىنشا سەگىز ادام قىلمىستىق جاۋاپكەرشىلىككە تارتىلۋدا. اقمولا وبلىسىندا ءدىني توپتىڭ ارەكەتى توقتاتىلدى.
اتالمىش توپ ەركىن جىنىستىق قاتىناستاردى جانە وتباسىلىق قۇندىلىقتاردان باس تارتۋدى ناسيحاتتايتىن "رۋحاني ورتالىق" ۇيىمداستىرعان. ءتىنتۋ بارىسىندا ءدىني ادەبيەتتەر، اتريبۋتتار مەن ريتۋالدىق زاتتار تابىلدى. قاجەتتى ساراپتامالار تاعايىندالىپ، تەرگەۋ جۇرگىزىلۋدە.
بۇعان دەيىن استانا، الماتى جانە شىمكەنت قالالارىندا "ەليتالىق ەسكورت" ۇيىمداستىرۋشىلارىنىڭ قىزمەتى توقتاتىلدى. ولار تۇنگى كلۋبتار مەن بارلارعا جاس قىزداردى تارتىپ، جەڭگەتايلىقپەن اينالىسقان. قىلمىستىق ىستەر سوتقا جىبەرىلدى.
سونىمەن قاتار، الماتى مەن استانا قالالارىنىڭ تۇنگى ويىن-ساۋىق ورىندارىندا پروفيلاكتيكالىق رەيدتىك ءىس-شارالار وتكىزىلدى. ونىڭ ماقساتى - ازاماتتاردى قىلمىستىق قاناۋ تاۋەكەلدەرىنىڭ الدىن الۋ، جاستاردى اسوسيالدى ارەكەتكە تارتۋ فاكتىلەرىن بولدىرماۋ جانە قوعامداعى مورالدىق قۇندىلىقتاردى نىعايتۋ. كەشەندى پروفيلاكتيكالىق جۇمىس جالعاسادى.