شەتەلدىك جۇمىسشىلاردىڭ ەلىمىزدە زاڭسىز جۇرگەنى «كەلىمسەك» رەسپۋبليكالىق جەدەل الدىن الۋ ءىس-شاراسى بارىسىندا انىقتالعان.
وزبەكستاننان كەلگەن 20 ازامات الماتىداعى قۇرىلىس الاڭىندا زاڭسىز جۇمىس ىستەگەن، دەپ حابارلايدى Almaty-akshamy.kz Polisia.kz سايتىنا سىلتەمە جاساپ.
الماتى قالاسىندا ءتيىستى قوعامدىق ءتارتىپتى ساقتاۋ، شەتەلدىكتەردىڭ قازاقستان رەسپۋبليكاسىندا بولۋ ەرەجەلەرىن بۇزۋ فاكتىلەرىن انىقتاۋ ماقساتىندا وتكىزىلگەن «كەلىمسەك» رەسپۋبليكالىق جەدەل الدىن الۋ ءىس-شاراسى بارىسىندا كورشى مەملەكەتتەن زاڭسىز كەلگەندەر انىقتالدى.
«الماتىنىڭ بوستاندىق اۋدانىندا ورنالاسقان "ارحات" شاعىناۋدانىنداعى تۇرعىن ءۇي كەشەنىنىڭ اۋماعىندا وزبەكستاننان كەلگەن قۇرىلىس بريگاداسى جۇمىس ىستەگەن. ولار، جۇمىس بەرۋشىلەرى سياقتى، ەلىمىزدىڭ قولدانىستاعى كوشى-قون زاڭناماسىن بۇزىپ، سول ءۇشىن اكىمشىلىك جاۋاپكەرشىلىككە تارتىلدى جانە ءپد-نىڭ قابىلداپ-تاراتۋ ورتالىعىنا ورنالاستىرىلدى. كەيىن سوت شەشىمىمەن شەتەلدىكتەر قازاقستاننان شىعارىلادى»، – دەدى الماتى قالالىق پد كوشى-قون قىزمەتى باسقارماسىنىڭ باستىعى اسحات بۋتۋنچينوۆ.
سونىمەن قاتار، بايانداماشى ءىس-شارانىڭ ءۇش كۇنىندە انىقتالعان قۇقىقبۇزۋشىلىقتاردىڭ ستاتيستيكاسىن ايتىپ ءوتتى.
«كوشى-قون زاڭناماسىن بۇزعانى ءۇشىن بارلىعى 921 كوشى-قون زاڭناماسىن بۇزۋشى اكىمشىلىك جاۋاپكەرشىلىككە تارتىلدى، ولاردىڭ 686-سى - ق ر بولۋ ەرەجەلەرىن بۇزعان شەتەل ازاماتتارى. سوت شەشىمىمەن 25 شەتەلدىك قازاقستان رەسپۋبليكاسىنان شىعارىلدى. سونداي-اق، شەتەلدىكتەردىڭ قر-دا بولۋىنىڭ زاڭدىلىعىن قامتاماسىز ەتۋ شارالارىن قولدانباعانى ءۇشىن 211 قابىلداۋشى تاراپ جاۋاپكەرشىلىككە تارتىلدى. قازاقستان رەسپۋبليكاسىنا شەتەلدىك جۇمىس كۇشىن تارتۋ ەرەجەلەرىن بۇزعانى ءۇشىن 24 جۇمىس بەرۋشى دە جاۋاپقا تارتىلدى»، – دەپ حابارلادى اسحات بۋتۋنچينوۆ.