الماتىدا قالالىق كولىك قوزعالىسىن جانە جولاۋشىلار تاسىمالىن ۇيىمداستىرۋ باسقارماسى پوليسيا دەپارتامەنتىمەن بىرلەسىپ، جول قوزعالىسى قاۋىپسىزدىگىن ارتتىرۋ جانە كەپتەلىستەردى ازايتۋ بويىنشا كەشەندى جۇمىستاردى جۇزەگە اسىرىپ كەلەدى.
كولىك جۇرگىزۋشىلەرىنىڭ قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 594-بابىندا كوزدەلگەن تالاپتاردى بۇزۋىن بولدىرماۋ ماقساتىندا قالانىڭ ون قارقىندى قوزعالىستى قيىلىسىندا 1.28 ساندى جولاق – "رەتتەلەتىن قيىلىس ايماعىن بەلگىلەۋ" (ياعني، "ۆافەل" جولاق) سىزىلدى.
جاڭا جولاقتار كەلەسى كوشە قيىلىستارىندا پايدا بولدى:
• اباي داڭعىلى – نازاربايەۆ داڭعىلى؛
• اباي داڭعىلى – ماسانچي كوشەسى؛
• اباي داڭعىلى – برۋسيلوۆسكيي كوشەسى؛
• اباي داڭعىلى – مومىش ۇلى كوشەسى؛
• اباي داڭعىلى – تۇرعىت وزال كوشەسى؛
• ابىلاي حان داڭعىلى – بوگەنباي باتىر كوشەسى؛
• ساتبايەۆ كوشەسى – ناۋرىزباي باتىر كوشەسى؛
• ساتبايەۆ كوشەسى – جاروكوۆ كوشەسى؛
• جاندوسوۆ كوشەسى – جاروكوۆ كوشەسى؛
• روزىباكييەۆ كوشەسى – تولە بي كوشەسى.
بۇل شارا كولىكتەردىڭ توقتاۋسىز جۇرۋىنە جانە جول قوزعالىسى كەزىندە كولىكتەردىڭ كەپتەلىس جاعدايىندا قيىلىستىڭ ورتاسىندا توقتاپ، كولدەنەڭ باعىتتاعى قوزعالىسقا كەدەرگى كەلتىرمەۋگە باعىتتالعان.
باستى ماقسات – جۇرگىزۋشىلەر ءتارتىبىن كۇشەيتۋ، جول-كولىك وقيعالارىنىڭ سانىن ازايتۋ جانە اسىرەسە، قاربالاس ساعاتتاردا كولىك قوزعالىسىنىڭ ۇزدىكسىزدىگىن قامتاماسىز ەتۋ.
اكىمشىلىك پوليسيا باسقارماسىمەن جانە "كوركەم تەلەكوم" جشس-مەن بىرلەسىپ، اتالعان اۋماقتارعا فوتو جانە بەينەباقىلاۋ كامەرالارىن ورناتۋ بويىنشا پيلوتتىق جوبانى الدى. ەگەر وڭ ناتيجە كورسەتسە، جوبا كەزەڭ-كەزەڭىمەن قالانىڭ باسقا كوشەلەرىندە دە ەنگىزىلەدى.
"ۆافەل" جولاقتار مەن زاماناۋي باقىلاۋ جۇيەلەرىن قولدانۋ – الماتىداعى جول قوزعالىسىن ۇيىمداستىرۋدى جەتىلدىرۋ جانە جول قاۋىپسىزدىگىن ارتتىرۋ باعىتىنداعى جۇيەلى جۇمىستىڭ ءبىر بولىگى.